މަޒުމޫނު

ސިޔާސީ ހަލަބޮލިކަމުގެ ސަބަބުން ކިޔަވާކުދިންނަށް ކުރާ ނޭދެވޭ އަސަރު


ޙަސަން ސަމީޙް، ފުނަމާގެ، ހއ. އިހަވަންދޫ، އިހަވަންދޫ ސްކޫލް، 12 ބީ (2014)

ކުލަކުލައިގެ ވާދަވެރިކަމަކީ މީގެކުރިން ދުނިޔެ ތަޖުރިބާކޮށްފައިވާ ކަމެއް ނޫނެވެ. އެއްވެސް ޤައުމެއްގެ ތާރީޚްގައި އައިސްފައިވާ ވާހަކަތަކެއްވެސް ނުމެނޫނެވެ. އެކަމަކާ މެދު ކާބަފައިން ޚިޔާލަށް، ފިކުރަށް ގެނެސްފައިވެސްނުވާ އަލަތު ވާދަވެރިކަމެކެވެ. ނަސްލީ ތަފާތުކުރުންތަކާއި ޖާހާއި ޤަދަރުގެ މޮޅުދެރަ ޘަޤާފަތުންނާއި ޢަޤީދާގެ ފުށުއެރުންތަކުން ދުނިޔޭގެ ތާރީޚްގައި ހިނގާފައިވާ ހިތާމަވެރި ހާދިސާތައް ހަނދާންނައްތާލީކީ ނޫނެވެ. މިނިވަންކަމާއި ތަހްޒީބީ ހޭލުންތެރިކަމަށް ދަޢުވާކުރަމުންދާ ދީމުޤްރާތީ ވެށިތަކުން މިމަންޒަރު އެބީދައިން ތަކުރާރުވާތީ އާޅާކިޔެން ނެތީއެވެ. ފެނި ތަޖުރިބާކުރަމުން މިދަނީ އެއަށްވުރެވަކި ބުރަދަނުގެ ގޮތުން ލުއި ފިކުރީ ތަފާތުކުރުމެއް ނޫނެވެ. މިދައްކަނީ ބޭރުފުށުން އާދައިގެވީނަމަވެސް ބޮޑުމަންޒަރުގައި އިންތިހާއަށް ހިތްދަތިކަމާއި ކަރުނައިން ފުރިގެންވީ އެތައްކަމެއް ޝާމިލްވާ ވޭނީތަފާތުކުރުމެއްގެ ވާހަކައެވެ. އެންމެންވެސް ދަންނަ [ޒަމާނީ ސިޔާސީ] ހަރަކާތުން އުފަންވެފައިވާ ކުލަކުލައިގެ ތަފާތުކުރުމެވެ.

މިއީ، އިހުގައި އެއްބައިވަންތަ، މިކުޑަކުޑަ ދިވެހިރާއްޖޭގެވެސް ހާލަތެވެ. ޙަޤީޤީ ސިޔާސީ ހަރަކާތްތައް އުވިގޮސް [ޒަމާނީ ސިޔާސީ] ހަރަކާތްތައް އުފެދުމުގެ ހިތި ނަތީޖާއެވެ. [ޒަމާނީ ސިޔާސީ] ހަރަކާތްތަކަކީ ސިޔާސީ ހަލަބޮލިކަމުގެ އަޞްލެވެ. އަނެކާގެ އަންނައުނާއި ގެންގުޅޭ ސާމާނުން ސިޔާސީ ފިކުރު މިންކޮށްލައިތަން އަންނަނީ މަދަކުންނޫނެވެ. ދެމީހަކު އެއްވެފައިވާ ޖަމާއަތަކުން އެކުލަ މިކުލައިގެ އަންބާތަކާއި ޅެންތައްނޫނީ އަޑެއް ނީވެއެވެ. މިކަންތައްތަކުގެ އަސަރު މުޅި މުޖުތަމަޢަށް މިދަނީ ފޯރަމުންނެވެ. އިއްޔެ މެންދުރު ބިމުގައި ކިރިޔަކިރިޔާ ފާއެޅުނު ޅަކުއްޖާއިން ފެށިގެން އުމުރުން ދުވަސްވުމުން އިނާޔަތްތައްދޭ ރައްޔިތު މީހާއާހަމައަށް މިކަމުގެ އަސަރު ކޮށްފައިވެއެވެ. ހިތާމައަކީ މާދަމާ، ޒިންމާދާރު ޒުވާނުންކަމުގައި ވާންތިބި މިއަދުގެ ކިޔަވާކުދިންނަށް މިކަމުގެ ސަބަބުން ފޫނުބެއްދޭވަރުގެ ބޮޑެތި ގެއެްލުންތަކެއްވަމުންދާކަމެވެ.

ޕާޓީތަކުގެ ބޯގިނަކުރުމަށާއި އިންތިހާބުތަކާ ދިމާކޮށް ރުހުން ހޯދުމަށް، ސިޔާސީ އިސްލީޑަރުން ކުރަމުންދާ ދަތުރުތަކުން ހޫނު މަރްހަބާތައް ކިޔަމުންދާ ކަމަށާއި މަރްހަބާކިޔުމަށް އެއްވެފައި ތިބޭމީހުންގެ އަދަދުން މިވެނި ބަޔަކަށް ތާޢީދު އެބައޮތްކަމަށް ނޫސްތަކުގެ ފަލަސުރުޙީތަކަށް އަރަނީ މަދުފަހަރަކުނޫނެވެ. މިކަންތައްތަކުގެ ޙަޤީޤަތަށް ބަލައިލާއިރު ފެންނަނީ ދެކެންބޭނުންވާ މަންޒަރުތަކެއްނޫނެވެ. މިނިވަން މުއައްސަސާތަކުން ތުހުމަތުކުރާ ބީދައިން 18 އަހަރުނުވާ ކުޑަކުދިން ނުވަތަ ކިޔަވާކުދިން މިފަދަ ހަރަކާތްތަކުގައި ބައިވެރިކުރާކަމީ ދެކޮޅުހެދެންނެތް ހަޤީޤަތެވެ. މިއީ އެކުދިން ސިޔާސީ ހަރަކާތްތަކުގެ ތެރެއަށް ވެއްދުމުގެ ބިންގަލެވެ. މިކަމުގެ ސަބަބުން އުމުރާ ނުގުޅޭ އަޑުތައް އިވި ކިޔަވާކުއްޖެއްގެ މިންގަނޑުން ބޭރުވުމުގެ އިތުރުން މަދަރުސާގެ ޤަވާޢިދުތަކަށް ހުރުމަތްތެރިކޮށް ނުހިތުމުގެ މައްސަލަތަށް އަންނަނީ ފެންމަތިވުމުންނެވެ. އެޅުނު ފިޔަވަޅު އިތުރަށް ވަރުގަދަކޮށް، އަބަދުވެސް ސިޔާސީ ފިކުރުގައި ކުއްޖާ ގެނބިގެނދާތަން އަންނަނީ ފެންނަމުންނެވެ.

މިއަދު އުފެދިފައިވާ ސުވާލަކީ އަމިއްލަ ގޯތީގެ ހަތަރު ފާރު އެތެރެއަކީ ކިޔަވާ ކުއްޖަކަށް އެންމެ އެކަށޭނެ ގޮތަށް ބައްޓަން ކުރެވިފައިވާ މާހައުލެއްތޯއެވެ؟ ގޭތެރެއިން އިވެމުންދަނީ މަންމަ އާއި ބައްޕަގެ ނޫނީ ދައްތަ އާއި ބޭބެގެ ސިޔާސީ ކޯޅުމުގެ އަޑުތަކެވެ. ނޫނީ ފެންނަމުންދަނީ ކާފަ އާއި ބޮޑުބޭބެ ކޯޅުން ގަނޑެއްގައި ގެއިން ނުކުމެގެންދާ މަންޒަރެވެ. މިއީ މިއަދުގެ ހާލަތެވެ. ގޭތެރޭގައި ފޮތް ހިފައިގެން ފިލާވަޅުތައް މުޠާލިޢާ ކުރަން އޮންނަ ދަރިފުޅުގެ ހާލަތު ދެކޭނެ ލޮލެއް އެ ހަތަރުފާރު އެތެރެއަކު ނުވާކަހަލައެވެ. އެދަރިފުޅަށް މަޖުބޫރުވަނީ ކިޔެވުމަށް ވުރެ ގޭތެރޭގެ ކަންކަމަށް ސަމާލުކަންދީ އެކަންތައްތަކާމެދު ވިސްނުމަށެވެ. ބައްޕަ ރުޅިއަތުވެދާނެތީި އެވެނި މިވެނި ވާހަކައެއް އަޑުނާހާ ކަންފަތް ބަންދުކުރުމަށެވެ. ބޭބެ ހިތްނުތަނަވަސްވާނެތީ ވަކި ވާހަކަތަކެއްނުދައްކާ ހަނުހުރުމަށެވެ. މިކަމުގެ ސަބަބުން، ކިޔަވާ ކުއްޖަކަށް ގޭތެރެއިން ލިބެންޖެހޭ އަޅަލުމުގެ ޛައްރެއްވެސް ނުލިބި، ނަމުގައި މަދަރުސާއަށް ފޮތްދަބަސް ހިފައިގެން ގެ އާ މަދަރުސާއާ ދެމެދު ބުރުޖަހާ ކުއްޖަކަށް ދަރިފުޅު ބަދުލުވެގެންދެއެވެ. މިފަދަ ކުއްޖަކަށް ގޭތެރޭގެ ކޯޅުން ފިޔަވައި އިތުރު އެހެން އެއްވެސް ކަމަކަށް ސަމާލުކަން ދެވޭނީ ކިހިނަކުން ހެއްޔެވެ؟

[ޒަމާނީ ސިޔާސީ] ހަރަކާތްތާއި ގޭންގްތަކުގެ ހަރަކާތްތަކާ ތަފާތެއްނެތް އެތައް ކަމެއްވެސް ފެންނަމުން އެބަދެއެވެ. އެގޮތުން އިންތިހާބުގެ ދުވަސްވަރުގައި އާންމުކޮށް ފެންނަމުންދާ ފާރުތަކުގައި ލިޔެ ކުރެހުމުގެ ހަޑިމުޑުދާރު އަމަލަކީ ނާތަހުޒީބީ ޤައުމުތަކުގެ ހަމައެއްލަމައެއް ނެތް ގޭންގުތަކުން ކުރަމުން އަންނަ ކަމެކެވެ. ހަމަ މިބީދައިން އެހެން މީހުންގެ ޙައްޤަކަށް ބެލުމެއްނެތި ހަރުގެތަކުން އަޑުގަދަކުރާއިރު އެހެން ރައްޔިތުން ދިރި ތިބިކަންވެސް ގިނަފަހަރު ހަނދާނެއްނުހުރެއެވެ. މިއަދުގެ ކިޔަވާކުދިންގެ އަޚްލާޤް ގޯސްވާ މައިގަނޑު ސަބަބަކީ މިއީއެވެ. މަދަރުސާތަކުގެ ފާރުތަކާއި ގޮނޑިމޭޒު ފެންފޮތިލާ ދޮންނަން ޖެހޭ ސަބަބަކީވެސް މިއީއެވެ. އެތައް މަދަރުސާއެއްގައި ކިޔަވާ ނުދެވިގެން ހުއްޓާލަންޖެހޭ ސަބަބަކީވެސް މިއެވެ. ތެދެކެވެ. ކިޔަވާކުދިނަށްވެސް މުޖުތަމަޢަށް އަންނަ ކޮންމެ ބަދަލެއްވެސް އަންނާނެއެވެ. ނަމަވެސް ކަންބޮޑުވާންޖެހޭ ކަމަކީ މުޖުތަމަޢުން ފެންނަ މިފަދަ ކަންތައްތަކުން ކިޔަވާކުދިންގެ ތަޢުލީމާއި އަޚްލާޤް ދުވަހެއް ދުވަހަކަށް ދައްވަމުންދާކަމެވެ. ނަތީޖާ ދަށްވެ އެހެންމީހުންނަށް އިޚްތިރާމުކުރުމަކީ ކޮބައިކަންވެސް ހަނދާންނެތޭކަމެވެ. މަދަރުސާގެ އިސްވެރިންނާ ބޭނުންގޮތަކަށް ބޭނުން ރާގަކަށް މުޚާތަބު ކުރުމުގެ ހިތްވަރު ލިބޭކަމަކީ މިއެވެ.

ދެންއޮތީ ސިޔާސީ ޚަބަރުފަތުރާ މީޑިއާގެ ވާހަކައެވެ. ސިޔާސީ ކޮންމެ ކޯޅުމެއް މޫނުބަލައި ލޯގަނޑެއްފަދައިން ފެންނަން ހުންނަނީ މި ނޫސްތަކާއި ވެބްސައިޓުތަކުގައެވެ. ހަމައެހެންމެ އަބަދުމެ އަޑުއިވިއިވި ހުންނަނީ ރޭޑިއޯތަކުންނާއި ޓީވީތަކުންނެވެ. މި ވަޞީލަތްތަކަކީ ކިޔަވާކުދިން މައުލޫމާތު ހޯދުމަށްޓަކައި އަބަދުމެ ކިޔައި އަޑުއަހާ ވަޞީލަތްތަކެވެ. މީޑިއާތަކުންވެސް ސިޔާސީ ކަންކަމަށް މާބޮޑު ސަމާލުކަމެއް ދިނުމުގެ ސަބަބުން މިއަދު މިވަނީ ކިޔަވާކުދިންނަށް މިމަގުވެސް ހަނިވެފައެވެ. ކުދިންނަށް ބޭނުންވާ އާންމު މައުލޫމާތުތައް ނުލިބި ސިކުނޑީގެ ކާނާ ކަމުގައިވާ ކިޔުންތެރިކަމަށްެވެސް ބުރޫއަރާފައެވެ. މިއީ ދަރިވަރުންގެ ތައުލީމީހަޔާތުން އުނިވެގެންދާ މުހިންމު ބައެކެވެ. ކުދިންގެ ނަތީޖާއަށްވެސް އަސަރުކުރުވަނިވި ކަމެކެވެ.

ސިޔާސީ ހަލަބޮލިކަމުން ރާއްޖެއަށް، ޙާއްޞަކޮށް ކިޔަވާ ކުދިންނަށް މިދަނީ ބޮޑެތި ގެއްލުންތަކެއް ލިބެމުންނެވެ. ހީވެސް ނުކުރާފަދަ ގޮތްގޮތަށް، ކުރެވޭ އާދައިގެ ކަމަކުންވެސް އެކުދިންގެ ތަޢުލީމީ ޙަޔާތް ބަނަވަމުންނެވެ. އެކުދިންގެ އަޚްލާޤް މިވަނީ ގޯސްވެ ވަރަށް ދަށު ދަރަޖައަކަށް ވެއްޓިފައެވެ. މިއީ މިއަދު ކޮންމެ މީހަކުވެސް ވިސްނާލާ ހެޔޮ ރަނގަޅު ފިޔަވަޅުތަކެއް އަޅަންވެއްޖެ ކަމެކެވެ. މާދަމާ ޒުވާން އުމުރުގައި ލާޗާރުބިޗާރުވެގެން މަގުމަތި ކުޑަކުރާބަޔަކަށް އެކުދިންވުމަކީ އެކަށީގެންވާ ކަމެކެވެ. މިއަދުގެ ހާލަތު އޮތްގޮތުން ސިފަވަނީ ވެސް ހަމަ މިފަދައިންނެވެ.