ނޭކުރެންދޫ ދަތުރުގެ ހަނދާން..

ދަތުރުނާމާ

ޙަސަން ސަމީޙް / 12ބީ

ނިދިފައި އޮތް، ގަދަ ނިދިން ހޭލެވުނީ ހާލާއި ކޮވެލީގެ ޤުދުރަތީ މިއުޒިކީ އަޑަކަށް ނޫނެވެ. އަހަރެންނާ (ޙަސަން ސަމީޙް/ ފުނަމާގެ/ ހއ.އިހަވަންދޫ) އިންވެގެން އަހަރެންގެ ޖިސްމުން ހޫނު ހޯދަމުންދިޔަ ސޮނީގެ އަސަރުގަދަ ރުއިމުގެ އަޑަށެވެ. އަހަރެން ހީކުރީ ޝައިޠާނީ ހުވަފެނެއްގެ އަސަރު ސޮނީއަށް ކުރީކަމަށެވެ. ނަމަވެސް ވީ އެހެންނެއް ނޫނެވެ. އެރޭ އަހަރެންނަށް ސޮނީވީ ވަޢުދު އަމާނާތްތެރިކަމާއެކު ފުއްދައިދިނީއެވެ. ސޮނީއަކީ އަހަރެންގެ އެންމެ ގާތް އެކުވެރިޔާއެވެ. އަހަރެންގެ [ސޮނީ އެރިކްސަން w200i] މޮބައިލް ފޯނެވެ.

ހޭލެވުމާއެކު އެންމެ ފުރަތަމަވެސް ބަލައިލެވުނީ ފާރުގައި ހުރި ގަޑިއަށެވެ. އޭރު ގަޑިން ފަތިހު 5 ޖަހަން 10 މިނެޓް ހުއްޓެވެ. ވަގުތަކީ އަގުބޮޑު ނިޢުމަތަކަށްވެފައި ނަމާދަކީ ދީނުގެ ތަނބަށްވުމުން ވަގުތުގައި ފަތިސްނަމާދު އަދާކޮށް ދުވަހުގެ މައި ތާވަލަށް ރުޖޫޢަވީމެވެ. ދުވަހަކީ 2012 ސެޕްޓެމްބަރ 7ވީ ހުކުރު ދުވަހަށްވީނަމަވެސް ދުވަސް ޚާއްޞަވެފައިވަނީ އިހަވަންދޫ މަދަރުސާގެ ގުރޭޑް 12ގެ ދަރިވަރުން ދަތުރުނާމާ ލިޔުމަށް ހއ.އިހަވަންދޫން ހދ.ނޭކުރެންދޫއަށް ކުރާ ދަތުރަށެވެ. ކުރީ ދުވަހު އަހަރެންވެސް މިދަތުރަށް ފުރިހަމައަށް ތައްޔާރުވެ ދަބަސް ތައްޔާރުކުރީމެވެ. ފަތިހުގެ ހިތްގައިމު އަޅުކަމަށްފަހު، އާދައިގެ މަތިން ކޮފީއެއް ބޮއެގެން، ދަބަސް ހިފައިގެން ގެއިން ނުކުތީ އައްޔަ (ކުލާސް ކުއްޖެއް) އަންނާތީއެވެ. އޭނަ އައުމުން އޭނައާއެކު އަތިރިމައްޗަށް މިސްރާބުޖެހީ އެހެންކުދިންތަކަކާއެކުވެސް ދިއުމަށެވެ.

އަތިރިމައްޗަށް ނުކުމެވުނު އިރު ގާތްގަނޑަކަށް 5:30 ހިނގަނީއެވެ. އެވަގުތުވެސް މަގުތަކުން ކުދިންކުދިން ދަބަސް ހިފައިގެން އަންނަމުން ދެއެވެ. ބައެއްކުދިން ބައިގަނޑު ހަދައިގެން އަތިރިމައްޗަށް އެއްވެފައިވެސް ތިއްބެވެ. އަހަރެމެންނަށް ދެވުނުލެއް ލަސްވީކަމަށްވެސް ވެދާނެއެވެ. އެހެންހިތާ މަޑުކުރުމެއްނެތި ދޯނި ކައިރިއަށް ދިޔައިރު މުދައްރިސުންވެސް ފޫގަޅައިލައިގެން ޙާޟިރުވެ ތިއްބެވެ. ދޯންޏަށް އަރުވަންޖެހޭ ސާމާނު ވާޓަރުމަތީ ހުރުމުން އަހަރެންވެސް ގެނައި އިތުރު ސާމާނު އެތަނުގައި ބެހެއްޓީމެވެ. ނަމަވެސް ދަބަސް ކޮނޑުން ނައްޓާލުމަކަށް ހިތެއް ނޭދުނެވެ.

ދޯނި ފުރުމަށް ތާވަލުކުރެވިފައިވަނީ 6:00ގައެވެ. އެހެންކަމުން ފުރުމަށް ވަގުތުކޮޅެއް އޮތުމުން ދަބަހުން ކެމެރާނަގައި ފަތިހުގެ ހިތްގައިމު ގުދުރަތުގެ ޗާލުކަމުން މަންޒަރެއް ކުރަހާލެވޭތޯ ބެލީމެވެ. ހަމައެވަގުތު ދަތުރުގެ ބައިވެރިންގެ ހަނދާނަށް މަންޒަރުތަކެއް ރައްކާކުރެވޭތޯވެސް ބެލީމެވެ. ވަގުތު ގާތްވަމުން ދިޔަވަރަކަށް ކުދިންތައް ޙާޟިރުވަމުން ދިޔައެވެ. ފުރާ ގަޑި ގާތްވުމުން ކުދިންގެ ހާޟިރީބަލައި އައިޑީކާޑުތައް އެއްކުރުމުގައި ދިވެހި މުދައްރިސް ފަޠުހުﷲ އަހްމަދާއި ޢަބްދުލް މާނިޢު (ކުލާސް ކުއްޖެއް) ޙަރަކާތްތެރިވަމުން ދިޔައެވެ. ޙާޟިރީބެލުމުން ހައެއްކަ ކުދިންނާއި ޕްރިންސިޕަލް ޙާޟިރުނުވާކަން އެނގުމުން އެމީހުން އަންނަންދެން މަޑުކުރީއެވެ. އެވަގުތު ދޯންޏަށް ސާމާނާއި ކުދިންގެ ދަބަސްތައް އަރުވަމުން ދިޔައެވެ.

ދަތުރުގެ ހުރިހާ ބައިވެރިން އަތިރިމައްޗަށް އެއްވިއިރު ގާތްގަނޑަކަށް 6:20 ވެދާނެއެވެ. އެއަށްފަހު ވަގުތު ސަލާމަތްކުރުމަށްޓަކައި ލަސްނުކޮށް ހުރިހާ ބައިވެރިންވެސް ދޯންޏަށްއެރުމަށް އެންގުމުން ދޯންޏަށް އެރިއެވެ. އެދަނޑިވަޅުގައި އަހަރެން ހުރީ އެމަންޒަރު މޫވީކުރާށެވެ. ހަނދާނުގެ ފަތްފުއްތަކަށް ދިރުމެއް ލިއްބައިދިނުމުގެ މަޤްޞަދުގައެވެ. ދޯންޏަށް އެންމެހައި ބައިވެރިން އަރައި ހަމަޖެހުމާއެކު ދޯނީގެ ދަތުރުފެށިއެވެ. އެއިރު 6:30 ހިނގާފާނެއެވެ. މިދަތުރުގައި އަހަރެންނާއެކު 14 ފިރިހެން ދަރިވަރުންނާއި 17 އަންހެން ދަރިވަރުންނާއި 3 ބެލެނިވެރިން ބައިވެރިވިއެވެ. ހަމައެއާއެކު ޕްރިންސިޕަލާއި ޑެޕިއުޓީ ޕްރިންސިޕަލާއެކު 5 މުދައްރިސުންނާއި 3 މުދައްރިސާއިން ބައިވެރިވިއެވެ. ދަތުރުގެ ދޯނިކަމަށްވާ [މުތީ] ދޯންޏާ ހަވާލުވެގެން ދޯނީގެ ކައްޕިއާއި 2 ފަޅުވެރިއަކު ބައިވެރިވިއެވެ. އެހެންކަމުން މިދަތުރުގައި ޖުމުލަ 45 މީހުން ބައިވެރިވިއެވެ.

ދަތުރު ފެށި، އިހަވަންދޫ ފަޅުން ނުނިކުމެވެނީސް ދަތުރު ދުޢާ ކިޔުމަށް ދިވެހި މުދައްރިސް އަހަރެންނާ ހަވާލުކުރިއެވެ. އެމަސައްކަތް ފަރުވާތެރިކަމާއެކު އަދާކުރީމެވެ. އެއަށްފަހު، ވައި ޖައްސާލުމަށް އަހަރެން ނުކުމީ ދިރުނބާކޮޅަށެވެ. އެދުވަހު ކޮންމެވެސް ވަރަކަށް ވައިޖެހެއެވެ. ނަމަވެސް ކަނޑު ވަރަށްމަޑެވެ. އުޑުމަތީ ވިއްސާރަވިލާ ރޮއްޖެއްވެސް ނެތެވެ. ދަތުރަކަށް ހަމަ އެންމެ ރަނގަޅުވާނެ މޫސުމުން މޫސުން ތަންދިނެވެ. ދިރުނބާކޮޅުގައި އަހަރެންނާއި ފިރާޤް (އެންމެ އެކުވެރި، ކުލާސް ކުއްޖެއް) ވާހަކަދައްކައިލަން ގާތްގަނޑަކަށް 10ވަރަކަށް މިނެޓް މަޑުކޮށްލީމެވެ. އިރުކޮޅަކުން އަހަރެންގެ ބޯސަކަރާތްވާން ފެށިއެވެ. މިއީ އަހަރެންނަށް އައު ކަމެއްނޫނެވެ. ކަނޑުމައްޗަށް އެރިއްޔާ ހާލު ހުންނަގޮތެވެ. މިގޮތަށް ކަންތައް ދިމާވުމުން އެތެރެއަށްވަދެ ގޮނޑިއެއްގައި އިށީނީމެވެ. ދޯންޏަކީ ފެރީ ކުރާ ދޯންޏަކަށްވުމުން ދަތުރުގެ ބައިވެރިން އިށީނދެ އިތުރުވާވަރަށްވެސް ޖާގަ އޮތެވެ.

ގޮނޑީގައި އިންއިރުވެސް ހީވަނީ ދެންމެދެންމެ ވެއްޓިދާނެ ހެންނެވެ. އެހާވެސް ބޮޑަށް އުނދަގޫވިއެވެ. އެކަމުވެސް ހަމަޖެހިލައިގެން އަރާމުކޮށްލެވޭތޯ ބެލީމެވެ. އެކަމުވެސް ކުރާނީ ކީއްހެއްޔެވެ؟ އަހަރެންގެ މިއެދުން ހަރާބުވީ ކުއްލިއަކަށް މޭސަކަރާތްވެ ހޮޑުގެ އަސަރު ކުރަންފެށުމުންނެވެ. ހަމައެވަގުތު ދިރުނބާކޮޅަށް ނިކުމެ އެހެންމީހުންނަށް އުނދަގޫ ނުވާނޭ ފަދައިން ހޮޑުލެވޭތޯ މަސައްކަތްކުރީމެވެ. ހޮޑަށް އަންނާނީވެސް ވަކި ކޮންއެއްޗެއްހެއްޔެވެ؟ ކައި އެއްޗެއްގެ ޒައްރެއްގެ މިންވަރުވެސް ބަނޑަށް ލެވިފައެއް ނެތެވެ. ފަތިސްގަޑީ ބުއި ކޮފީ، ހޮޑުގެ ގޮތުގައި ބޭރުކޮށްލުމަށްފަހު، އަނެއްކާވެސް ދިރުބާކޮޅުގައި އިށީނދެލީމެވެ. ޖެހެމުންދިޔަ ސާފުވައިގެ އެހީގައި ހަމަޖެހުމެއް ލިބޭތޯއެވެ.

އަހަރެން އެކަނިމާއެކަނި ދިރުނބާކޮޅުގައި އިންނާތީ ގިނަ ކުދިންތަކެއް އައިސް އަހަރެންނާ އެއްބައިވެ އެތަނުގައި އިށީނިއެވެ. އެކުދިން މަޖާ ވާހަކަތައް ކިޔަމުން އެއްކުއްޖަކު އަނެއްކުއްޖަކާ ސަމާސާ ކުރަމުން ދިޔައެވެ. ދޯނީގެ ކައްޕި (އަހަރެންގެ ބޮޑުބޭބެ) ވެސް އެކުދިންނާ ސަކަރާތްޖެހުމުގައި އެވަގުތު އެތަނުގައި އިނެވެ. ނަމަވެސް އަހަރެން ބުދެއްފަދައިން އަނގައިންނުބުނެ އިންގޮތަށް އިނީއެވެ. އޭރުވެސް ކުޑަކޮށް އުނދަގޫވާތީއެވެ. ހަމަ އެދަނޑިވަޅުގައި ދަތުރުގެ އިސް މީހެއްގެ ގޮތުން ޙަރަކާތްތެރިވި ފަތުޙުﷲ ސަރ އާއި އަރީބު ސަރ، ހެނދުނުގެ ނާސްތާއަށް އަންހެން ކުދިން ތައްޔާރުކޮށް ދޯންޏަށް އަރުވާފައިވާ ތަކެތި ހިފައިގެން ދިރުނބާކޮޅަށް އައިސް އެތަނުގައި ތިބި ކުދިންނަށް ކައިއެއްޗެއް ދެވޭތޯބެލިއެވެ. އެތައްފަހަރެއްގެ މަތިން އަހަރެންނަށްވެސް ކައިންދެވޭތޯ އުޅުނެވެ. ނަމަވެސް އަހަރެންނަކީ ދަތުރެއްގެ މައްޗަށް އަރައިފިނަމަ ކައިއެއްޗެއް ކައި މީހަކަށް ނުވާތީ އެންމެ އެތިކޮޅެއްވެސް ނުކަމެވެ.

ގާތްގަނޑަކަށް ބައި ގަޑިއިރުވީތަނާ، ﷲގެ އިރާދަފުޅުން ކުރިންވީ އުނދަގޫތައް އެއްކޮށް ފިލައިގެން ދިޔައެވެ. އިންތަނުން ތެދުވެ އެންމެފުރަތަމަވެސް އަހަރެން މަސައްކަތްކުރީ ބަނޑުހައި ހޫނުކަން ފިލުވައިލެވޭތޯއެވެ. ކައި އެއްޗެއް ކައިގެންނެއް ނޫނެވެ. އަހަރެންނަށް މިހެން ދިމާވާނެތީ ދަތުރަށް ތައްޔާރުވުމުގެ ތެރެއިން ލުއި ބުއިންތަކެއް ހޯދީމެވެ. ބަނޑުހައި ހޫނުކަން ފިލުވައި ގައިގައި ވަރުޖެއްސުމަށް ބޭނުންކުރީ އެބުއިންތަކެވެ. އެއަށްފަހު އަހަރެން، ހަމައެއްކޮށް ހަމަޖެހިއްޖެއެވެ. ދެން އުޅެވުނީ މުދައްރިސުންނާއި އެހެންކުދިންނާއެކު ދޯނިމަތީ ސަކަރާތް ޖަހާށެވެ. އަހަރެން އުޅުނީ ކެމެރާ ހިފައިގެން ފޮޓޯނެގުމަށެވެ. ނޫނީ ވީޑިއޯ ކުރުމަށެވެ. އަހަރެމެންގެ ކަމަކަށްވީ ހޮޑުލީ ކުދިންނާއި ދަތުރު ވަރުބަލީގައި ތިބި ކުދިންނާ ސަމާސާ ކުރުމެވެ. ނޭކުރެންދޫއާ ކައިރިވަންދެން އަހަރެން އުޅުނީ މިފަދަ ގޮތަކަށެވެ.

ނޭކުރެންދޫގެ މަލަމަތި ލޮލުކޮޅަށް ދައްކައިލުމާއެކު ކުދިންގެ މޫނުމަތިން ހިނިތުންވުން ފެނިގެންދިޔައެވެ. 3 ގަޑިއިރުގެ ދިގުދަތުރަށްފަހު މަންޒިލަށް ވާޞިލްވެވޭތީއެވެ. ނޭކުރެންދޫގެ ނެރުގެ ދެދަނޑި ހުރަސްކުރިއިރު ބަރާބަރު 9:38 ހިނގަނީއެވެ. އެވަގުތު އަހަރެން އަވަސްވެގަތީ އެރީތި މަލަމަތީގެ ހަނދާންތަކެއް ކެމެރާގައި ރައްކާކުރެވޭތޯއެވެ. އެ ޤުދުރަތީ ފުރިހަމަ މަންޒަރުން ހިތަށް ފިނިކަން ލިބިގެންދިޔައީތީއެވެ. ބަލައި ފޫހިނުވާނެފަދަ ރީތި ފެހިކަމުން، އެ މަލަމަތިން ފެންނަނީ އާރޯކަމެވެ. އެ ބިޔަ ކަނޑޫ ގަސްތައް ހެޔޮހިތުން މަރުޙަބާއޭ ބުނާކަހަލައެވެ.

ރަށަށް ލެފުމާއެކު ހުރިހާދަރިވަރުންވެސް އެކުއްޖެއްގެ ދަބަސް ހިފައިގެން ބިޔަ ކަނޑޫ ގަސްތަކުގެ ދަށަށް ފިނިކޮށްލުމަށް ދިޔައީއެވެ. އެވަގުތު، އެއްވެސް މީހަކު މަރުހަބާ ދަންނަވަން ނެތުމުން، އަހަރެންގެ ހިތުގައި ބޮޑު ސުވާލެއް އުފެދުނެވެ. މި ސުވާލު ފިރާޤާ ކުރުމުން އޭނަ ދިން ޖަވާބަކީ އަހަރެމެން ލަފާކުރިވަރަށްވުރެ އަވަހަށް އާދެވުނީއެވެ. އަހަރެންނަށް ލިބުނީ ކުއްލި ހައިރާން ކަމެކެވެ. އެއީ ދުވެލި މަޑުކަމަށް އެހާ މަޝްހޫރު ދޯންޏެއްގައި ހީކުރިވަރަށްވުރެ އަވަހަށް އާދެވުނީތީއެވެ. މާގިނައިރުތަކެއް ނުވަނީސް ނޭކުރަންދޫ ސުކޫލުގެ އިސްވެރިންނާއި މުދައްރިސުންނާއި ދަރިވަރުން ޔުނީފޯމްގައި މަރުހަބާ ދެންނެވުމަށް އަތިރިމައްޗަށް އައެވެ. އެއަށްފަހު އެންމެން ސުކޫލަށް މިޞްރާބުޖެހިއެވެ.

ނޭކުރެންދޫ އަކީ ބޮޑުރަށެކެވެ. އަތިރިމަތިން ރަށުތެރެއަށްވެސް ދެވެނީ ލައްކަ ގިނައިރު ހިނގުމަށްފަހުއެވެ. ރަށުތެރެއަށް އެރުމަށް އޮތްމަގަކީ ފުޅާ ދިގު މަގެކެވެ. މަގުގެ މެދުގައި ކައިރިކައިރީ ލައިޓްތައް ޖަހައިފައި ހުއްޓެވެ. ރަށުތެރެއަށް އެރުނުވަރަކަށް ފެންނިގެންދިޔައީ އުފާވެރި މަންޒަރުތަކެކެވެ. މަގުތަށް ވަނީ ރީތިކޮށް ކުނިކަހައި ސާފުކޮށްފައެވެ. އެއަށްވުރެ ބޮޑަށް ފާހަގަކުރެވިގެންދިޔައީ އެކުގައި ދިޔަ ނޭކުރެންދޫ ސުކޫލުގެ ދަރިވަރުން ހިތްހެޔޮކަމެވެ. މޫނުމަތިން ފެނުނު ހިނިތުންވުމެވެ. އެކުދިންނާ އަހަރެންވެސް ހެޔޮހިތުން ވާހަކަދެއްކީމެވެ. އެންމެ ފުރަތަމަވެސް އަހަރެންނާ އެރަށުން ވާހަކަދެއްކީ ވިލްފް ކިޔާ ކުއްޖެކެވެ.

ސުކޫލާ ހަމައަށް ދެވެންދެން އަހަރެން އުޅުނީ ފޮޓޯ ނެގުމުގައެވެ. ދިގު ހިނގުމަކަށްފަހު ގާތްގަނޑަކަށް 10:00 ވީ އިރު ސުކޫލަށް ދެވިއްޖެއެވެ. އެވަގުތު ސުކޫލުގެ ބޮޑުގަސްދަށުގައި ކުރުނބާގެ ރިފްރެޝްމަންޓެއް އޮތެވެ. ގަސްދޮށުގައި ގޮނޑިތައް ޖަހައިފައިވަނީވެސް ވަރަށް ތަރުތީބުންނެވެ. މިކަންތައްތަކުން އިންތިޒާމުގެ ފުރިހަމަކަން ހާމަވެއެވެ. ރިފްރެޝްމަންޓްގެ ވަގުތަކީ އަރާމުކޮށްލުމުގެ މަޤްޞަދުގައި ޝެޑިއުލް ކުރެވިފައިވާ ކަމެއްނަމަވެސް އަހަރެން އުޅުނީ ކެމެރާގެ އަވާގައި ޖެހިގެންނެވެ. އަހަރެންގެ އެކުވެރި ފިރާޤްގެ ބަހުންނަމަ [މޮމެންޓް ކެޕްޗަރ] ކުރާށެވެ.

ރިފްރެޝްމަންޓްގެ ވަގުތުކޮޅަށްފަހު، ސުކޫލުގައި ދަބަސްތައް ބެހެއްޓުމަށްފަހު، ތާވަލާ އެއްގޮތަށް ދަނޑުވެރިކަންކުރާ ސަރަޙައްދު ބަލައިލުމަށް އެންމެންވެސް މިޞްރާބުޖެހިއެވެ. ދުވަހަކީ ހޫނުގަދަ ދުވަހަކަށްވުމުން އަނބުރާގަންނަ ވަރަށް ބޮލަށް ހޫނުވިއެވެ. އެހެންކަމުން ހިޔަލުގައި ހިނގައިފައި ދިއުމަށް ނަޝްފާ (ކުލާސް ކުއްޖެއް) ގެންގުޅުނު ކުޑައެއްގެ އެހީތެރިކަން ހޯދީމެވެ. ދަނޑުތަކަށް ދިޔަ މަގުމަތީގައި ފެންބުއިމަށްޓަކައި ގެއެއްގެ ދަށުގައި މަޑުވެސް ކުރީމެވެ. އެއަށްފަހު ދަނޑުތަކަށް ދިޔައިރު މައުލޫމާތުދިނުމަށް ކައިރީގައި އެރަށުގެ ދަރިވަރުން ޙަރަކާތްތެރިވިއެވެ. ދަނޑުތަކުގައި ހުރި ގަސްތަކުގެ ފުރިހަމަ މައުލޫމާތު އެކުދިން ޙިއްސާކުރިއެވެ. ދަނޑުތައް ބަލައިލުމަށްފަހު ގާތްގަނޑަކަށް 11:15 ހާއިރު އެނބުރި ސުކޫލަށް އާދެވުނެވެ.

ސުކޫލަށް އާދެވުމުން އަހަރެމެންނާ ހަވާލުވާންޖެހޭ ދަރިވަރުންތައް ވަކިކޮށް ބަހައިލިއެވެ. އަހަރެންނާ ހަވާލުވީ އަސްލު ލިސްޓްގައި އޮތްކުއްޖާއެއްނޫނެވެ. އެކުވެރި ފިރާޤް އާއެކު ލިސްޓްގައި އިންކުއްޖާ ދަތުރުގައި ބައިވެރި ނުވާތީ އަހަރެން އެ ޖާގަ ހޯދީއެވެ. ސިމާނާ މިސްގެ ދީލަތިކަމާއެކު އެކަން ބޭނުންވި ގޮތަށްވިއެވެ. އަހަރެންނާއި ފިރާޤްއާ ޙަވާލުވީ އެ ސުކޫލުގެ ޤާޒީ ހައުސްގެ ވައިސް ކެޕްޓަން ގުރޭޑް 8އޭ ގެ ދަރިވަރު މުޙައްމަދު ވިލްފް އަސުރުމާގެއެވެ. ދުވަހަކީ ހުކުރު ދުވަހަށްވުމުން ވަގުތު ނަގާނުލައި 11:30 ހާއިރު ވިލްފްގެ ގެއަށް މިޞްރާބުޖެހީމެވެ.

އެގެއަށް ދިޔަ މަގުމަތީގައި ރަށުގެ މުހިންމު ތަންތަން ވެސް ފެނުނެވެ. އެގޮތުން އެރަށުގައި ފުރަތަމަ ދެބުރިއަށް ހަދައިފައިވާ ގެ ކަމަށްބުނާ ގެ ފެނުނެވެ. ވިލްފާއި އޭނަގެ އެކުވެރި އަލްވީން ބުނާގޮތުން އެއީ ވަރަށް ނާމާން ގެއެކެވެ. އެގެއަކީ ފަޅުވެ، ވީރާނާ ވެފައިހުރި ގެއެކެވެ. ނަމަވެސް ބޭރުން ބަލައިލުމަށް ވަރަށް ރީއްޗެވެ. ދެން އެންމެ މުހިންމު ތަނަކަށް ފެނުނީ ރަށުގެ ބޮޑުހުކުރުމިސްކިތާއި (މަސްޖިދުލް އިޒްދިހާރު) ކުރީގެ މަދަރުސާ ނަމަވެސް މިހާރުގެ ޕްރީސްކޫލެވެ.

މާދުރު ރާސްތާއަކަށް ނުހިނގާ، ކުޑަ ވަގުތުކޮޅެއްގެ ތެރޭގައި ގެއަށް ދެވިއްޖެއެވެ. އެ ގެއަކީވެސް ރަށުގައި ފާހަގަކޮށްލެވޭ ގެއެކެވެ. އެއީ ރަށަށް ކޭބަލްޓީވީގެ ޚިދުމަތް ފޯރުކޮށްދޭ މައިމަރުކަޒެވެ. ގެއަށް ވަދެވުމުން ވިލްފުގެ އާއިލާގެ މެންބަރުންނާ ބައްދަލުވިއެވެ. އެންމެންވެސް ލޯތްބާއި އަޅައިލުމާއެކު ހެޔޮހިތުން ވާހަކަދެއްކިއެވެ. އަހަރެންނަށް ފެނިގެންދިޔައީ މެޙްމާންދާރީ އަދާކުރުމުގެ ނަމޫނާއެކެވެ. ތަޖުރިބާ ކުރެވުނީ އިސްލާމީ ރިވެތި ސިފަތަކާއި އަޚްވަންތަކަމުގެ ލޯތްބެވެ. ހުކުރަށްދާ ވަގުތު ގާތްވަމުން އަންނާތީ ދަބަސްތައް ބަހައްޓައި ތަކެތި ތަރުތީބުކޮށްލުމަށްފަހު ދިޔައީ އަވަހަށް ތައްޔާރުވެލާށެވެ. އެންމެނަށް ތައްޔާރުވެ ހަމަޖެހުނުތަނާހެން އަލްވީނުވެސް އެގެއަށް އަތުވެއްޖެއެވެ. އޭނަ އައުމާއެކު އެންމެންވެސް މިސްކިތަށް މިސްރާބުޖެހީއެވެ. އަހަރެމެނަށް ދެވުނުތަނާހެން ޚުޠުބާކިޔުމަށް އިމާމް މިންބަރަށް އެރިއެވެ. ކުއްލިއަކަށް އަހަރެންގެ ހަށިގަނޑަށް ލޮޑުކަމެއް އިޙްސާސްކުރެވުނެވެ. ދިގު ދަތުރަކަށްފަހު ފެންވަރައި ތާޒާވެލީމަ ކަމަށްވެސްދާނެއެވެ. ޚުޠުބާކިޔަމުން ދިޔައިރު އަހަރެންނަށް އިނެވުނީ ނިދޭނުނިދޭވަރުގައެވެ. އެހާވެސް ވަރުބަލިވެފައެވެ.

ހުކުރުކޮށް ނިމިގެން އަހަރެމެން ދިޔައީ ގެއަށެވެ. ގެއަށް ގޮސް ކުޑަގޮތަކަށް މެންދުރުގެ ކެއުމަށް އިންސާފުކުރީމެވެ. އެއަށްފަހު އަހަރެމެން ނުކުތީ ރަށުތެރެ ބަލައިލުމަށެވެ. ނަމަވެސް އެކަން ވާގޮތެއްނުވިއެވެ. ޝެޑިއުލްގައި 13:30ގައި ސުކޫލުގައި ކެއުން އޮތުމުން ލަސްވެގެން ގުޅީއެވެ. އަހަރެމެން ހީކުރީ ކެއުން އޮތީ 14:30ގައި ކަމަށެވެ. ހަމައެވަގުތު ސުކޫލާ ދިމާއަށް މިޞްރާބު ބަދަލުކޮށްލީމެވެ. އިސާހިތަކު ކުޑަވަގުތުކޮޅެއްގެ ތެރޭގައި ސުކޫލަށް ވާޞިލްވެވުނެވެ. ކެއުން ތައްޔާރުކޮށްފައިވާ ކުލާހަށް ވަދެވުނުއިރު އެންމެންވެސް ފޯރީގައި އިންސާފުކުރަމުން ދިޔައެވެ. ކައިމޭޒުމަތި ފެނިފައި އަހަރެން ދިޔައީ ސިއްސައިގެންނެވެ. މެންދުރުގެ ކެއުމަށް ބޭނުންވާނެ ހުރިހާ ކާނާއެއް އެތަނުގައި ހުއްޓެވެ. ބަތްގަނޑުތަކާއި ރިހަގަނޑުތައް ފެނިފައި އަހަރެންވެސް ކައިހިތްވިއެވެ. ފޮނިއެއްޗެހިވެސް ރީތި ފަރުމާތަކުން ފަރުމާކޮށްފައި ހުއްޓެވެ. އަންބާއެއްފަދައިން އެންމެންވެސް ކިޔަމުންދިޔައީ ރަހަތަކުގެ ފުރިހަމަކަމުގެ ވާހަކައެވެ. އަހަރެންނަށް ޔަޤީންކުރެވޭގޮތުން ތިންހަތަރު ބުރު ކެއި މީހުންވެސް މަދެއް ނޫނެވެ. ނަމަވެސް އަހަންނަށް އެހާ ރަނގަޅަށް ކެވޭ ގޮތެއް ނުވިއެވެ. ގެއިން ކެއިތާ މާގިނައިރެއްވެސް އޭރު ނުވާތީއެވެ. އެވަގުތުވެސް އަހަންނަށް ފާހަގަކުރެވުނީ ބެލެނިވެރިންގެ ހިތްހެޔޮކަމާއި ހުނަރުވެރިކަމެވެ.

މެންދުރުގެ ކެއުމަށްފަހު އަރާމުކޮށްލުމަށް ސުކޫލުގެ ބޮޑުގަހުގެ ދަށުގައި ހުރިހާކުދިންވެސް ތިއްބެވެ. އެއީ ކުރިއަށް އޮތް ތަޢާރަފުވުމުގެ ޙަރަކާތަށްޓަކައިވެސް މެއެވެ. މި ޙަރަކާތް ފެށުމުގެ ކުރިން ދެސުކޫލުގެ ދަރިވަރުން ގުރޫޕުހަދައި އެއްވެލައިގެން ވާހަކަދައްކަން ތިއްބެވެ. އަހަރެންވެސް މަޖާކޮށް ސަކަރާތްޖަހާލުމަށް އެކުދިންނާ ބައިވެރިވީމެވެ. އެއަށްފަހު ގާތްގަނޑަކަށް 14:50 ހާވަރުގައި ތަޢާރަފުވުމުގެ ޙަރަކާތް ފެށުނެވެ. މިޙަރަކާތުގައި ދެސުކޫލުގެ ދަރިވަރުންނާއި މުދައްރިސުން ބައިވެރިވިއެވެ. މިޙަރަކާތް ކޯޑިނޭޓްކުރީ ނޭކުރެންދޫ ސުކޫލުގެ ދެމުދައްރިސުންނެވެ. ޝިފާޒާމިސް (ޗިޕޫމިސް) އާއި ސިމާނާ މިސްއެވެ. ޙަރަކާތުގައި ކުރިއަށްދިޔައީ ކޮންމެ ކުއްޖަކުވެސް މަޖާގޮތަކަށް އަމިއްލައަށް އަމިއްލަ ތަޢާރަފެއް ދޭގޮތަށެވެ. ކަންދިމާކުރިގޮތުން އެންމެ ފުރަތަމަ ތަޢާރަފުވާން ވެސް ޖެހުނީ އަހަރެންނަށެވެ. ބިސްމިނުގެ ބަރަކާތުން އަހަރެން، މިޙަރަކާތް ފެށީ އުފަލާއެކުއެވެ. އެ މާހައުލުން އަހަރެންނަށް އެތައް އެކުވެރިންނެއް ލިބުނެވެ. ހިތްހެޔޮކަމާއެކު ވާހަކަދައްކާލާނެ އެތައް ރަޙްމަތްތެރިންނެއް ލިބުނެވެ. ތަޢާރަފުވުމުގެ ޙަރަކާތް ނިމުނީ ގާތްގަނޑަކަށް 15:39 ހާވަރުއެވެ.

ތާވަލުގައި ވާގޮތުން ހަވީރުގެ ފިނި ހިތްގައިމު ވަގުތު ޚާއްޞަކުރެވިފައިވަނީ ދެސުކޫލުގެ ފިރިހެން ކުދިންގެ ދެމެދު ކުޅެވޭ ފުޓުބޯޅަ މެޗަށެވެ. އެހެންކަމުން ތަޢާރަފުވުން ނިންމާލުމަށްފަހު އަހަރެންނާއި ފިރާޤް އަދި ވިލްފް ދިޔައީ މެޗަށް ތައްޔާރުވުމަށްޓަކައި ބެނުންވާ ބައެއް ތަކެތި ގަތުމަށެވެ. އެއަށްފަހު ދިޔައީ ރަސްމީ ފުޓުބޯޅަ ދަނޑަށެވެ. ކުއްލިއަކަށް އަހަރެން ހަނދާންވީ މެޗަށްޓަކައި ގެނައި ފަސްޓް އެއިޑްގެ މަތިންނެވެ. ހަމައެވަގުތު ފަސްޓް އެއިޑް ބަލައި، ވިލްފް ގެއަށް ދިޔައެވެ. މިކަންތައްތަކުންވެސް އެކުދިން އަހަރެމެނަށް އެއްބާރުލުންދޭ މިންވަރު ހާމަވެއެވެ. އިސާހިތަކު ދެޓީމުގެ ކުޅުންތެރިންނާއި މުދައްރިސުން ދަނޑަށް ޙާޟިރުވެއްޖެއެވެ. އެއަށްފަހު 25 މިނެޓްގެ ވާރމްއަޕަކަށްފަހު 16:25ގައި މެޗްފެށުނެވެ. މެޗްގެ ކޮންމެ މިނެޓެއްވެސް ދިޔައީ ވަރަށް ފޯރިގަދަ މަޖާ ވަގުތުކޮޅަކަށް ވެގެންނެވެ. މިފޯރިމެޗް ބަލައިލުމަށާއި ހިތްވަރުދިނުމަށް ގިނަ އަންހެން ދަރިވަރުންވެސް ދަނޑަށް ޙާޟިރުވިއެވެ. ދެޓީމުގެ ފަރާތުންވެސް ކުޅުނީ ދާދި އެއްފެންވަރެއްގައެވެ. އެހެންނަމަވެސް ނޭކުރެނދޫގެ ކުޅުންތެރިންގެ ހުނަރާއި ފިޒިކަލީ މާ ބޮޑަށްވެސް ރަނގަޅުކަން ފާހަގަކުރެވުނެވެ. މިފަދަ ގޮތަކަށް ދެ ހާފުނިމި މެޗުނިމިގެންދިޔައީވެސް އެއްވެސް ޓީމަކަށް ލަނޑެއް ކާމިޔާބު ނުކުރެވި 0،0 އިން އެއްވަރުވެގެންނެވެ. މެޗް ނިމުނުއިރު ގަޑިން 18:00 ހިނގާފިއެވެ. ވުމާއެކު ލަސްނުކޮށް ހުރިހާ އެންމެންވެސް ދިޔައީ ހަވީރުގެ ސައި ބުއިމަށް ސުކޫލަށެވެ.

އެދުވަހުގެ ރެއަކީ މުނިފޫހިފިލުވުމުގެ ޕްރޮގްރާމްތައް ކުރިއަށް ގެންދިޔުމަށް ރޭވިފައިވައި ރެއެވެ. އެހެންކަމުން ސައި ބުއިމަށްޓަކައި ސުކޫލަށް ދިޔަ މަގުމަތިންވެސް އަހަރެން މަސައްކަތްކުރީ މިރޭގެ ހުށަހެޅުމަށް ކުދިންތައް ތައްޔާރުވުމާއިމެދު މަޝްވަރާކުރެވޭތޯއެވެ. އެގޮތުން ކުދިންތައް ހަމަޖައްސާލައި ކުޑަ މައުލޫމާތުތަކެއްވެސް ދެވުނެވެ. ހަވީރު ސައިގައިވެސް ތަފާތުވައްތަރުގެ ހެދިކާ ތައްޔާރުކޮށްފައި ހުއްޓެވެ. ހަވީރުގެ ސަޔަށް އިންސާފުކޮށް ނިމުނުއިރު 18:40 ވެއްޖެއެވެ. އެއަށްފަހު ގެއަށްގޮސް ތާޒާވެލައިގެން 19:00ގައި ސުކޫލަށް އައުމަށް އެންގުމުން އަހަރެންވެސް ފިރާޤާއެކު ދިޔައީ ގެއަށެވެ. ގެއަށްގޮސް އަތްމަތި ވަރަށް އަވަސްކޮށްލައިގެން ވެސް ސުކޫލާހަމައަށް އާދެވުނީ 19:20 ގެން ބޮޑުވީފަހުންނެވެ. ވާނީވެސް އެހެންތާއެވެ. ގެއަށްވަދެވޭ ކޮންމެ ވަގުތެއްގައި ކެމެރާތަކާއި ފޯނު ޗާރޖަށް ޖަހަންޖެހެއެވެ.

ތާޒާވެލައިގެން ސުކޫލަށް އައިއިރު ކުދިންތައް ތިބީ ކުޑަކޮށް ހިތްހަމަވެސް ނުޖެހިފައެވެ. އެހެންކަމުން ސުކޫލަށް ދެވުމާއެކު ހުށަހެޅުމުގައި ބައިވެރިވާ ހުރިހާ ކުދިން އެއްކޮށް، މުދައްރިސުންގެ އެހީތެރިކަމާއެކު، ކުރިއަށް ގެންދާނެ ގޮތްތައް ކިޔައިދިނީމެވެ. އެންމެންވެސް އެއްބަސްވިގޮތަށް އަހަރެމެން ހުށަހެޅުމަށް ހަމަޖެއްސީ މަޖާ ޑްރާމާއެކެވެ. އަދަބީ އަދި ކިޔަވާކުދިންނާ ގުޅޭ ހެއްވާ މަޖާކޮށް ގެންދެވޭފަދަ ޑްރާމާއެކެވެ. ގާތްގަނޑަކަށް 19:40 ވީއިރު ޑްރާމާއަށް ހުރިހާ ކުދިންވެސް ތައްޔާރުކޮށް ނިންމާލެވުނެވެ. މި ޝޯއަށް އަޅުގަނޑުމެންވެސް ދިޔައީ އިންތިޒާރުކުރަމުންނެވެ. ސަބަބަކީ ނޭކުރެންދޫ ސުކޫލުގެ ދަރިވަރުންނަށް ދޭން އޮތް އަގުހުރި ހަދިޔާއެއް އޮތީތީއެވެ. ފަޠުޙުﷲ ސަރގެ އެދުމުގެ މަތިން، ޝުކުރުގެ ބަސްކޮޅަކާއިއެކު މި އައިޓަމް ކުރިއަށްގެންދިޔުމަށް އަހަރެންނާ ހަވާލުކުރިއެވެ. އެހެންކަމުން ޑްރާމާގެ ތައްޔާރީތަކަށްފަހު އަހަރެން މިކަންތައްތަކަށް ތައްޔާރުވެލީމެވެ.

ގަޑިން 20:15 ވީ ރޭގަނޑުގެ ކެއުމަށް އެންމެހާ މެޙްމާނުންނަށް މަރުހަބާ ކިޔަމުންނެވެ. މެންދުރުގެ ކެއުމަށް ދޫނުކުރާނެފަދައިން ރޭގަނޑުގެ ކެއުމުގައިވެސް އެތައް ވައްތަރުތަކެއްގެ ކާނާ ހުއްޓެވެ. އާދައިގެ މަތިން އެހެން ކުދިން ފޯރީގައި ކެއުމަށް އިންސާފު ކުރަމުން ދިޔައިރު، އަހަރެން ކުޑަގޮތަކަށް އެއްޗެއް ބަނޑަށް ލެވޭތޯ ބެލީމެވެ. އަހަރެންގެ ވިސްނުން އޭރުވެސް ހުއްޓިފައިހުރީ ޑްރާމާއަށެވެ. އަދި އެހެނިހެން އައިޓަމްތަކަށެވެ. ގާތްގަނޑަކަށް 21:10 ވީއިރު ކެއުމުގެ އެންމެހާ ކަންތައްތައް އެއްކޮށް ނިމިއްޖެއެވެ. އެވަގުތު އެރަށުގެ އެންމެހާ ދަރިވަރުން އެކުވެރިކަމާއި އެބައިވަންތަކާއެކު، ޝޯއަށް ހޯލު ތައްޔާރުކުރަމުންދިޔައެވެ.

އެންމެހާ ތައްޔާރީތައް ނިމި 21:25ގައި ބޮޑުބެރުގެ އައިޓަމަކުން ޝޯފެށިގެންދިޔައެވެ. އެއްއައިޓަމަށްފަހު އަނެއް އައިޓަމެއް ދިޔައީ ފޯރިގަދަވަމުންނެވެ. ވަރަށް ރީތި އުފެއްދުންތެރި އައިޓަމްތަކެއް ނޭކުރެންދޫގެ އެންމެހާ ދަރިވަރުން ހުށަހަޅައިދިނެވެ. އިހަވަންދޫ ސުކޫލުގެ ފަރާތުން ދެ އައިޓަމެއް ޝޯގައި ހުށަހެޅީމެވެ. އެއީ ދަތުރަށް ޚާއްޞަ ބަންޖަކާއި ޑްރާމާއެވެ. ޑްރާމާވެގެންދިޔައީ އަހަރެން ހީކުރިވަރަށްވުރެވެސް ކާމިޔާބު ޑްރާމާއަކަށެވެ. ޑްރާމާއިން އަހަރެންނަށް އެންމެ ކަމުދިޔަ ތަންކޮޅަކީ އިނާމެއް ހަވާލުކުރުމަށް، ޗިޕޫމިސް ސްޓޭޖަށް އަރުވައި އިނާމެއް ނެތޭ ބުނެ ޑްރާމާ ނިންމާލި ތަނުން މިސް ލަދުގަނެގެން ފޭބި މަންޒަރެވެ. މީގެއިތުރުން ދެފަހަރެއްގެ މަތިން އައިޓަމްގެ ދޭތެރެއަކުން އަހަރެން ޖާގައެއް ހޯދާ ކުރިން ބުނި ހަދިޔާ ނޭކުރެންދޫ ސުކޫލަށް، ޑެޕިއުޓީ ޕްރިންސިޕަލް ޢަބްދުލްވާހިދު ދާއޫދުގެ އަތްޕުޅުން ހަދިޔާކުރީމެވެ. އަދި ދަތުރުގެ ހަނދާނީ ފިލާ، ޕްރިންސިޕަލް ސައްޔިދު ކާޝިފް ރަޒާ ޒައިދީގެ އަތްޕުޅުން ހަވާލުކުރީމެވެ. މި ފޯރިގަދަ މަޖާ ޝޯ ނިމުނީ ގާތްގަނޑަކަށް 00:17ވީ ފަހުންނެވެ.

ޝޯ ނިމުމާއެކު ހުރިހާކުދިން ހޯލަށް އެއްކޮށް ފަޠުޙުﷲ ސަރ އަގުހުރި ނަޞޭޙަތެއް ދެއްވިއެވެ. އެއަށްފަހު ލަސްނުކޮށް ހުރިހާ ކުދިންވެސް އެއްކުއްޖަކާ ހަވާލުވެ ހުރި ކުއްޖާއާއެކު ގެތަކަށް ދިޔައީއެވެ. އަހަރެންނާއި ފިރާޤާއި ވިލްފަށް ގެއަށްދެވުނުއިރު 00:30 ވެއްޖެއެވެ. ގެއަށް ގޮސް ވަގުތުން ނިދަން މަސައްކަތްކުރިނަމަވެސް، ކޮންމެވެސް އެއްޗެއް ބަނޑަށްނުލައި ނިދުމަށް ވިލްފްގެ މަންމަ އެއްބަހެއްނުވިއެވެ. އެހެންކަމުން ނިދުމުގެ ކުރިން ކޮފީއެއް ބުއީމެވެ. އެއަށްފަހު ފޯނާއި ކެމެރާތަށް ޗަރޖަށް ޖެހުމަށްފަހު އަރާމު ނިންޖަކުން ނިދުމަށް އޮށޯތީމެވެ. ނިދިފައި އޮއްވާ ގާތްގަނޑަކަށް 4:00ގައި ކުއްލިއަކަށް ހޭލެވުނެވެ. އެއީ ނެރޭޝަން އޮޅުންބޮޅުންވެފައިވާ ބޮލަށް އުނދަގޫވާފަދަ ހުވަފެނެއް ފެނުމުންނެވެ. ހޭލެވުމުން ހުވަފެނާމެދު ކުޑަކޮށް ވިސްނާލީމެވެ. އެހެނަސް އެއްވެސް ކަމެއް ހުވަފެނަކުން ދޭހައެއް ނުވިއެވެ. އެހެން އޮއްވާ އިރުކޮޅަކުން އަނެއްކާވެސް ނިދިއްޖެއެވެ.

ހޮނިހިރުދުވަހުގެ އިރު ފެނުން ތޮޅެލިތާ ގަޑިއިރެއް ނުވަނީސް 7:00ގައި އަހަރެންނަށް ހޭލެވުނެވެ. އެއަށްފަހު އެއްވެސް ގޮތަކަށް ލޮލަކަށް ނިންޖެއްނައެވެ. ދެފަރާތަށް ފުރޮޅިލަފުރޮޅިލާ އޮތީއެވެ. އެއަރާމު ތަންމަތިން ތެދުވާން ޖެހުނީ، 8:30ގައި ސުކޫލަންދާންޖެހެއޭ ކިޔާ ވިލްފް ގޮވުމުންނެވެ. ހަމައެވަގުތު ފިރާޤަށްވެސް ގޮވައި ސުކޫލަށް ދިއުމަށް ތައްޔާރުވާން ފެށީމެވެ. އެންމެންވެސް ތައްޔާރުވެ ނިމުމުން، ވިލްފްގެ މަންމަ ތައްޔާރުކުރި ސައިތަށި ބޮއެގެން ސުކޫލަށް ދެވުނުއިރު 8:30 ވެއްޖެއެވެ. އެގަޑީ ސުކޫލުގައި އޮތީ ހެނދުނު ސައިގެ ކަންތައްތަކެވެ. އަހަރެންނާއި ފިރާޤް ސައި ހޯލަށް ވަންއިރު ހުރިހާ އެންމެންވެސް އިންސާފުކުރަމުންދިޔައެވެ. އަހަރެންވެސް ދެތިންރޮއްޓަކާއި މަސްހުނިކޮޅެއް ކައިލެވޭތޯ ބެލީމެވެ. ސިމާނާ މިސްގެ ހިތްވަރާއެކު މަސްހުނިކޮޅާއި ރޮށިތައް ހުސްކޮށްލެވުނެވެ. އެވަގުތު ސިމާނާ މިސް އަހަރެންނާއި ހިތްހެޔޮކަމާއެކު ވާހަކަ ދައްކަމުން ދިޔައެވެ.

ހުރިހާކުދިންވެސް ސައިބޮއެ ނިމުމުން ކުރިއަށްއޮތް ޕްރޮގުރާމަށް ތައްޔާރުވުމަށް ސުކޫލުގެ ބޮޑުގަސް ދޮށަށް އެއްވަމުން ދިޔައެވެ. އެވަގުތު ފަޠުޙުﷲ ސަރ އާއި ފިރާޤް، ޕްރޮގުރާމް ކުރިއަށް ގެންދާނެ ގޮތާމެދު މަޝަވަރާކޮށް ކުޑަ މަޖާ ޑްރާމާއަކުންފެށުމަށް ނިންމިއެވެ. ގަޑިން 9:15ވެގެން ދިޔައީ މިޑްރާމާއާއެކު މި ޕްރޮގުރާމް ފެށިގެންނެވެ. އެވަގުތުގެ ޕްރޮގުރާމް ޚާއްޞަ ކުރެވިފައިވަނީ ނޭކުރެންދޫ ދަރިވަރުންނަށް، ދަތުރުނާމާ ލިޔުމާ ގުޅޭގޮތުން މަޢުލޫމާތު ދިނުމަށެވެ. މަޢުލޫމާތު ދިނުމުގައި ފަޠުޙުﷲ ސަރ އާއި ފިރާޤާއިއެކު އަހަރެންވެސް ބައިވެރިވީމެވެ. ގާތްގަނޑަކަށް 9:50 ވީއިރު މި ޕްރޮގުރާމް ނިންމާލީ، ކަނޑޫފައިބަލައިލުމަށް ދާންއޮތް ވަގުތު ކައިރިވުމާ ގުޅިގެންނެވެ.

ހަމައެވަގުތު ހުރިހާ ދަރިވަރުންވެސް، ކަނޑޫފަލަށް ދިޔުމަށް އެކަށޭނެ ހެދުމެއްލުމަށް ގެއަށް ދިޔައެވެ. އަހަރެންނާއި ފިރާޤާއި ވިލްފްވެސް އެމަޤްޞަދުގައި ގެއަށް ދިޔައީމެވެ. ގެއަށްދެވުމާއެކު އަތްމަތިއަވަސް ކޮށްލައިގެން 10:00 ވީއިރު ސުކޫލަށް ޙާޟިރުވީމެވެ. ހަމައެއާއެކު ހުރިހާކުދިން ޙާޟިރުވުމުން ކޮންމެކުއްޖަކަށްވެސް ފެންފުޅިއެއްދީ ކަނޑޫފަލަށް މިސްރާބުޖެހިއެވެ. މަގުގެ އާރުކާޓީއެއްގެ ގޮތުން އެރަށުގެ ކޮންމެ ދަރިވަރަކުވެސް ކުއްޖަކާ ހަވާލުވިއެވެ. އަހަރެންވެސް ދިޔައީ އަހަންނަށް ލިބުނު ރަހްމަތްތެރިންތަކާއެކުއެވެ.

މީހުން ދިރިއުޅޭ ހިސާބާއި ކުޅިއާ ދެމެދު ދިގު ރާސްތާއެއް އޮތެވެ. 40 މިނެޓް ހިނގައިގެން ދެވުނީ ކިރިޔާ ވަލާހަމައަށެވެ. އެއަށްފަހު ކަނޑޫފަލުގައި އުޅެންޖެހޭނެގޮތާއި ދިމާވެދާނެ ކަންތައްތައްތަކާ ބެހޭގޮތުން އޮންދު ސަރ މައުލޫމާތު ދެއްވިއެވެ. އެއަށްފަހު ވަލުތެރެއިން އޮތްމަގަކުން ކަނޑޫފަލަށް މިސްރާބުޖެހިއެވެ. އަހަރެން އެވަގުތު އުޅުނީ ކެމެރާއިން ފޮޓޯތަކެއް ނެގޭތޯއެވެ. އެވަގުތު އަހަރެންގެ ކައިރީގައި އަލްވީނާއި ވިލްފް ހުއްޓެވެ. ފެންނަމުންދިޔަ އެކިއެކި ތަންތަނާ ބެހޭގޮތުން އެދެކުދިން މައުލޫމާތުދެމުން ދިޔައެވެ. ވަލުތެރެއިން ދިޔަމަގުން ފެނުނު އެންމެ ފާހަގަކޮށްލެވޭ ތަނަކީ ވީރާނާވެފައިހުރިކަމުގައި ވިޔަސް ސާފުފެން ހުރި ވަޅެކެވެ.

ކަނޑޫފަލަށް ދެވުނީ ވަލުތެރޭގައިވެސް ދިގު ރާސްތާއެއްގައި ހިނގުމަށްފަހުއެވެ. ކަނޑޫފަލަށް ވަދެވުމާއެކު ހުރިހައި އެންމެންވެސް ފައިވާންތައް އަތަށް ނެގިއެވެ. އެއީ ޗަކަގަނޑުތެރޭގައި ފައިވާނުގައި ނުހިނގޭނެތީއެވެ. އެހެންކުދިންނެކޭ އެއްފަދައިން ހުސްފައިގައި ހިނގުމަށް އެންމެފުރަތަމަ އަހަރެންވެސް ފަކުރުގަތެވެ. ނަމަވެސް ފަހުން އެކަންވީ މަޖާކަމަކަށެވެ. ޗަކަގަނޑުގައި ހިނގަންޖެހެނީ ގަސްތަކުގެ މޫތަކުގެ މަތީ ފައިއަޅައިގެންނެވެ. އެހެންނޫނީ ވަޅުގަނޑަކަށް ވެއްޓުން ގާތެވެ. މިކަންވީ އެންމެ ފުރަތަމަ ބޮޑުއަދަބަކަށެވެ. ނަމަވެސް ވިއްސަކަށް ފޫޓަށް ހިނގުނުފަހުން އެތަނުގައި ހިނގުމަށް ފަރިތަވެ، ފަސޭހަވެގެންދިޔައެވެ. ޗަކަގަނޑުން ފެށިގެން ފެންގަނޑު ނިމެންދެންވެސް އަހަރެން އުޅުނީ ކުލާސް ދެކުދިންނަށް އެހީތެރިވެދިނުމުގައެވެ. އެމީހުންނަށް ޗަކަގަނޑުގަޔާއި ފެންގަނޑުގައި ހިނގުންވީ ބޮޑު އުނދަގުލަކަށެވެ. ނަމަވެސް ވެއްޓެމުންނާއި އަރިއަޅަމުންވެސް ހިތްވަރާއެކު ފެންގަނޑު ހުރަސްކުރިއެވެ. އަހަރެން ކަނޑޫފަލަށް ދިޔައީ ވަރަށްގިނަ ރީތިމަންޒަރުތަކެއްގެ ފޮޓޯތަކެއްނެގުމުގެ އަޒުމުގައެވެ. ނަމަވެސް ކަނޑޫފަލަށް ވަދެވުމާއެކު ވިއްސާރަވިލާގަނޑެއްނަގައި ވާރޭ ވެހުމުގެ ސަބަބުން ކެމެރާ އަތުން ދޫކޮށްލައި ފޮރުވަން ޖެހުނީއެވެ. އެއީ ކެމެރާއަށް ފެންވަދެ ހަލާކުވެދާނެކަމުގެ ބިރަށެވެ.

ކަނޑޫފަލުގެ ފެންގަނޑަށް އެރި ދެން ދިޔައީ މޫދަށެވެ. ގަޔަށް ފެންއަޅައި ޗަކަތަށް ފިލުވައިލުމުގެ ބޭނުމުގައެވެ. ހުރިހާ އެންމެންވެސް މޫދަށް އެރުނެވެ. ނަމަވެސް މޫދަށް އެރެން ޖެހުނު ފަރާތަކީ ގާމަތީ ފަރާތަކަށްވުމުން މާމަޖާކުރެވޭ ގޮތެއްނުވިއެވެ. ހުރިހާ އެންމެންވެސް މޫދަށް އެރި ޗަކަ ފިލުވައި ނިމުމުން އެނބުރި ގެއަށް ދިއުމަށް ހިނގައިގަތީ އަތިރިމަތިންގޮސް ފަޅައި ދިމާއަށް ނިކުތުމަށެވެ. ރަށަކީ ބޮޑު ރަށަކަށްވުމުން ހިނގަންޖެހޭ ރާސްތާ ކުރިއަށްވުރެ އިތުރުވީއެވެ. ގައިއެތިމަތީ ހިނގަންޖެހުމުން އަދިމާބޮޑަށް އުނދަގުވިއެވެ. ނަމަވެސް އެކަންވީ އަހަރެންނަށް ވަރަށް [ސަޅި] ތަޖުރިބާއަކަށެވެ. އެހެންނަމަވެސް ބައެއްކުދިންނަށް ގައިއެތީ ހިނގުމުން އެކުނިވަޔަށް ދެމުމާއި އަވިގަދަވުމުގެ ސަބަބުން އެނބުރުންފަދަ ކަންތައްތައްވެސް ވިއެވެ. އަހަރެން ހިނގައިފައި އައީ އެންމެ ފަހަތުން އައި ގުރޫޕާއެކުއެވެ. ހިނގަން އޮތްރާސްތާގެ މެދަކާ ހަމައަށް އަހަރެމެންނަށް ދެވުނުއިރު ބައެއް ކުދިން މަންޒިލަށް ވާޞިލްވެއްޖެކަމުގެ ޚަބަރުވެސް ލިބުނެވެ. އަހަރެމެންވެސް ހިތްވަރާއެކު ފަޅު ފެންނަ ހިސާބަށް ހިންގަމުން ދިޔައީމެވެ.

ރަށުގެ މަލަމަތީހުރި ބިޔަ ގަސްތަކާ އަރައި ހަމަވީތަނާ ނާޒްލީން (ކުލާސް ކުއްޖެއް)ގެ ގައިން ވަރުދެރަވެ، އެނބުރުނެވެ. އެހެންކަމުން ސުނީމިސް އާއި ޔުމްނާމިސް އާއި ޗިޕޫމިސް އަދި ސިމާނާމިސް ވެގެން އަވަސް ފަރުވާއެއް ދެވޭތޯ ބެލިއެވެ. ގަސްތަކުގެ ހިޔަލުގައި ހުރި ޖޯލިފަތީގައި އޭނާ ބޭއްވުމުން ކުޑަލުޔެއް ލިބުނެވެ. ނަސީބަކީ އެވަގުތު އެތަނުގައި ދެ މަދަރުސާގެވެސް އިސްވެރިން ތިބިކަމެވެ. އެބޭފުޅުން، އޭނަ ގެއަށް ގެންދިއުމަށްޓަކައި އެރަށުގައި ދުއްވާ ވޭން ގެނެސްދެއްވިއެވެ. ސުނީމިސްއާއި ޔުމްނާމިސް އަދި ނަޝްފާ (ކުލާސް ކުއްޖެއް)ދިޔައީ އޭނައާއެކު ވޭން ގައެވެ. އެއަށްފަހު، އަހަރެންނާއި ދެން ތިބި މުދައްރިސުން ގެއާ ދިމާއަށް ދިޔައީ ހިނގާފައެވެ. އެހެންނަމަވެސް ސިމާނާމިސް އާއި ޗިޕޫމިސް، އަހަރެންނާއެކު ގެއަށްދާނެ ކުއްޖަކު ހޯދައިދިނެވެ. ދެން އަހަރެން ގެއަށް އައީ އެކުއްޖާއާއެކު ބައިސްކަލުގައެވެ.

ގެއަށް އާދެވުނުއިރު ގަޑިން 13:25 ވެއްޖެއެވެ. އޭރު ވިލްފް އާއި ފިރާޤް ގޭގައި އުޅެއެވެ. އަހަރެން ގޮސް އެންމެފުރަތަމަވެސް ބެލީ ގަޔަށް ރީތިފެން ފޮދެއް އެޅޭތޯއެވެ. މޫދަށް އެރި ގިނައިރުވުމުން ލޮނު ހިކިފައި ހުރުމުންނެވެ. އެއަށްފަހު ކޮޓަރިއަށް ވަދެވެން ވީލަހެވެ. ނަޝްފާގެ ކޯލެއް އައެވެ. އޭނަ ބުނީ ނާޒްލީން އަނެއްކާވެސް ސަކަރާތްވި ވާހަކައެވެ. އެވަގުތު ފިރާޤް ފާޚާނާއިން ނުކުތެވެ. އަހަރެން ކައިރީ އަވަސް ކުރަންބުނެ، އޭނަ މުދައްރިސުންނަށް ނަޝްފާ އެދުނު ޚަބަރު ދިނެވެ. އަހަރެން ވަރަށް އަވަސްކޮށްލައިގެން ތައްޔާރުވެގެން ނުކުތުމުން ނާޒްލީން މަރުކަޒަށް ގެންދިކަމުގެ ޚަބަރު ލިބުމުން ވިލްފްއާއި އަލްވީނާއެކު އަހަރެމެން މަރުކަޒަށް ދިޔައީމެވެ. އެތަނުން ހުރިހާ މުދައްރިސުންނާވެސް ދިމާވިއެވެ. ގިނަ މުދައްރިސުން އުޅުނީ ތެތްވެސްނުބާލައެވެ. އަހަރެމެން ދިޔުމުން ފަޠުޙުﷲސަރ އެންގީ ދަތުރަށް ބޭނުންވާނެ ބައެއްތަކެތި ގަނުމަށެވެ. އެދުވަހުގެ 14:00ގައި ފުރުންހަމަޖެހިފައި އޮތްކަންވެސް އަހަރެންގެ ހަނދާނަށް އައީ ދެނެވެ.

ހަމައެވަގުތު އަހަރެމެން ދިޔައީ ފިހާރަތަކަށް އެއްޗިހި ގަންނާށެވެ. ފެނާއި ޓިޝޫއާއި އެކިވައްތަރުގެ ޕެކެޓްތައް ގަނެ ގެއަށް ލީމެވެ. ފިހާރަތަކަށް ހިނގިއިރު އަހަރެމެން މިރަށުން އަދި ނުފުރުމަށް ދިމާވި މީހުން އެދެމުންދިޔައެވެ. މިކަމުންވެސް އެރަށުގެ ރައްޔިތުންގެ ހިތްސާފުމިންވަރު އެނގިގެންދެއެވެ. އެއަށްފަހު ދެންދިޔައީ ސުކޫލަށެވެ. އެއީ މެންދުރުގެ ކެއުމަށް އިންސާފުކުރާށެވެ. ސުކޫލަށް ދެވުނުއިރު ގަޑިން 14:40 ހިނގާފިއެވެ. ސުކޫލަށް ދެވުމާއެކު އަހަރެންބެލީ ސުނީމިސްގެ ލެޕްޓޮޕަށް ފޮޓޯތައް އަޅާލެވޭތޯއެވެ. އޭރު ފިރާޤް ކެއުމާގެން ކުރިއަށްދަނީއެވެ. އަހަރެމެނަށް ދެވުނުއިރު ހުރީ އެންމެން ކައި ނިމިފައެވެ. ބައެއް ކާތަކެތިވެސް ހުސްވެފައެވެ. ކެއުން ތައްޔާރުކުރި ބެލެނިވެރިން އެކަމާ ވަރަށް ދެރަވެސް ވިއެވެ. އެގަޑީވެސް އަހަރެން އެއްވެސް އެއްޗެއް ނުކަމެވެ. ބޮވުނީ ހަމައެކަނި ޖޫސްތައްޓެކެވެ. އެގަޑީ ކުއްޖެއްގެ ފަރާތުން ޚަބަރުލިބުނީ ސަމާހާ (ކުލާސްކުއްޖެއް)، ފާޚާނާތެރެއަށް އެނބުރިގެން ވެއްޓިފައި އޮއްވާ ސިއްޙީމަރުކަޒަށް ގެންދިވާހަކައެވެ. އެވަގުތު އަހަރެމެނަށް އެކަން އެނގުނުއިރު އޭނަ މަރުކަޒަށް ގެންގޮސްފިއެވެ.

ކަންތައްތައް މިގޮތަށް މެދުވެރިވުމުން ފުރުން ލަސްވާނެކަން އަހަރެންނަށް ޔަޤީންކުރެވުނެވެ. އެހެންވެގެން އެއްވެސްތަނަކަށް ނުގޮސް އެހެންކުދިންތަކެކޭ އެއްފަދައިން އަހަރެންވެސް ސުކޫލުގައި މަޑުކުރީއެވެ. އަހަރެންނާއި ފިރާޤް އިނީ ލެޕްޓޮޕަށް އެޅުނު ފޮޓޯތައް ބަލާށެވެ. އިރުކޮޅަކުން ވައިގަދަވެ މޫސުންވެސް ގޯސްވާންފެށިއެވެ. ވިއްސާރަވިލާތަކުގެ އަސަރުފެނި ގަދަ ވަޔާއެކު ވިއްސާރަ ވެހެންފެށިއެވެ. އެވަގުތު އަހަރެންގެ ފޯނު، ކޯލުތަކުން ބިޒީވިއެވެ. ރަށަށްވެސް ވައިގަދަވެ މޫސުންގޯސްވީމާ އާއިލާގެ މީހުންގެ ކަންބޮޑުވުންތަކުގެ ކޯލުތަކެވެ.

އެފަދަގޮތަކަށް ސުކޫލުގައި ތިއްބާ، މޫސުންގޯސްވުމުންނާއި ބައެއްކުދިން ބަލިވުމުގެ ސަބަބުން ދަތުރު ކެންސަލްވިކަމުގެ ޚަބަރުލިބުނެވެ. އެވަގުތު ނޭކުރަންދޫ ސުކޫލުގެ ދަރިވަރުން އުފަލުން ފޮޅުނެވެ. އެ ޚަބަރު ލިބުމާއެކު އަހަރެން މަސައްކަތްކުރީ ހުރިހައި ކުދިންނަށްވެސް މިޚަބަރު ފޯރުކޮށްދެވޭތޯއެވެ. އޭރު ގަޑިން ގާތްގަނޑަކަށް 16:00އެވެ. އިރުކޮޅަކުން ފަޠުޙުﷲސަރ އެންގީ ހުރިހާ ކުދިން ސުކޫލުގެ ހޯލަށް އެއްކޮށްލުމަށެވެ. އެއަށްފަހު ސަރ ހުރިހާކުދިންނަށްވެސް ދަތުރު ކެންސަލްވިގޮތް ސާފުކޮށްދިނެވެ. އަދި ކަންތައް ކުރަންވީ ގޮތްވެސް ސާފުކޮށްދިނެވެ. ދެން ފުރުން އޮންނާނީ އަނެއް ދުވަހުގެ ހެނދުނުކަމުގައިވެސް ބުންޏެވެ. މިކަންތައްތަކަށްފަހު މާގިނައިރުތަކެއްނުވެ، މަރުކަޒުން ދޫކޮށްލުމުން، ނަޝްފާއާއެކު ނާޒްލީންވެސް ސުކޫލަށް އައެވެ. އެއިރުވެސް ސަމާހާ އޮތީ މަރުކަޒުގައި އެޑްމިޓްކޮށްފައެވެ.

ދަތުރުގެ ހުރިހާ ބައިވެރިންނާ ވަކިންވެސް ބައްދަލުކޮށް ފަޠުޙުﷲސަރ، ނަޞޭޙަތް ދިނެވެ. އެއަށްފަހު އަހަރެމެން ދިޔައީ ސުކޫލުގެ ހޯލުގައި ގޮނޑިޖެހުމާއި މޭޒުތައް އެތުރުމުގައި އެކުދިންނަށް އެހީތެރިވެދިނުމަށެވެ. ހުރިހާ ކުދިންގެ މަސައްކަތާއެކު މާގިނައިރުތަކެއް ނުވަނީސް ކުލާސްތައް ރަމަތަކޮށް ނިމިއްޖެއެވެ. އޭގެ ކުޑަ އިރުކޮޅެއް ފަހުން 17:15ގައި ވަރަށް ކުއްލި ގޮތަކަށް ޖޫހާއި ބިސްކޯދުގެ ކުޑަ ކެއުމެއް ސުކޫލުގައި ހަމަޖައްސާ ހުރިހާ ކުދިންނަށް އެނގިއެވެ. މެންދުރު ނުކައި ހުރުމުގެ ސަބަބުން އަހަރެންވެސް ހުރީ ވަރަށް ހައިވެފައެވެ. އެހެންކަމުން ހަށިގަނޑުގައި ވަރުޖެއްސޭތޯ މަސައްކަތްކުރީމެވެ.

ކައިނިމިގެން ގެއަށް ދިޔުމަށް ނިކުތްގަޑީ އެރަށުގެ ކުދިންނާއެކު ފޮޓޯތަކެއް ނެގުމަށް އެދުމުން ކުޑަވަގުތުކޮޅަކަށް މަޑުކޮށްލަންޖެހުނެވެ. އޭރުވެސް ތުނިތުނިކޮށްވާރޭ ވެހެމުންދިޔައެވެ. މިކަންތައްތަކުން އަވަދިވެގެން ގެއަށްދެވުނު އިރު ގާތްގަނޑަކަށް 18:00 ގާތްވެދާނެއެވެ. ގެއަށް ދެވުމާއެކު މަސައްކަތްކުރީ ފޮޓޯތައް އެރަށުގެ ކުދިންނަށް ދެވޭތޯއެވެ. އިރުކޮޅަކުން މަޣްރިބުނަމާދުގެ ބަންގިގޮވުމާއެކު ދިޔައީ މިސްކިތަށެވެ. މިސްކިތުން އަޔާޒް އާއި އެހެން ކުދިންތަކަކާވެސް ދިމާވިއެވެ. އެކުދިންވެސް އެދުނީ ފޮޓޯތައް ދިނުމަށެވެ. ދެންމިސްކިތުންއައިސް ހުރިހައި ކުދިންނަށް ފޮޓޯތައް ބަހައިލެވުނުއިރު ޢިޝާނަމާދަށް ގޮވާފިއެވެ. އިޝާނަމާދުން ފަވާޒުއާ ދިމާވުމުން އެގެއަށް ކައިން ދިޔުމަށް އެދުނެވެ.

ޢިޝާނަމާދުން އައިސް އަހަރެމެން އެންމެންވެސް އެންމެފުރަތަމަ މިސްރާބުޖެހީ މަރުކަޒާދިމާއަށެވެ. އެއީ ސުނީމިސްގެ ލެޕްޓޮޕް ޙަވާލުކުރުމަށެވެ. ނަމަވެސް މިސްއާ ގުޅުމުން މަރުކަޒުގައި ނޫންކަމަށް ބުންޏެވެ. އަހަރެމެން މަގުމަތީ ދިޔައީ ވަރަށް ސަކަރާތް ޖަހަމުންނެވެ. އަޔާޒްއަށް ކެމެރާ ހަވާލުކުރުމުން އޭނަ އުޅުނީ އަބަދު ފޮޓޯނެގުމުގައެވެ. ކަންދިމާކުރީ ވަރަށް ރަނގަޅަށެވެ. މަގުމަތިން ހުރިހާ މުދައްރިސުންނާ ދިމާވިއެވެ. މަރުކަޒަށް ދާންނުޖެހި މަގުކުރުވިއެވެ. ދެން ސުނީމިސް އަށް ލެޕްޓޮޕް ހަވާލުކުރުމަށްފަހު އަހަރެމެން މިސްރާބުޖެހީ ފަވާޒުގެ ގެކަމަށްވާ ވީލްގެއާ ދިމާއަށެވެ. އެއީ ފަވާޒުގެ ވަރަށް ބޮޑު އެދުމަކަށްވާތީއެވެ. ފަވާޒުގެ ގެއަށް ދެވުނުއިރު 20:30 ވެއްޖެއެވެ. އެގެއިން ފަވާޒުގެ އާއިލާގެ މެންބަރުންނާއި ދިމާވިއެވެ. އެންމެންވެސް ވަރަށް ރަނގަޅެވެ. ހިތްހެޔޮއެވެ. އެވަގުތު އެމީހުން އެދުނީ ކެއުމަށެވެ. އެއްވެސް ދެކޮޅު ހެދުމެއްނެތި ހުރިހާ ކުދިންވެސް ކެއެވެ. އެއަށްފަހު އަހަރެމެންގެ ގެއާ ދިމާލަށް މިސްރާބުޖެހީމެވެ. އެއިރު ގަޑިން 21:06 ވެއްޖެއެވެ.

ގެއަށް ދިޔަ މަގުމަތިން، ޢީދަށް ތައްޔާރުވުމުގެ ގޮތުން އަންހެނުން ބޮޑުބެރުޖަހަމުންދިޔަ އަޑު އިވުނެވެ. ހަމައެއާއެކު ޑެޕިއުޓީ ކެޕްޓަން އަޒްމީގެ ގެއަށްވެސް ވަދެލީމެވެ. ކުޑަކޮށް ސަކަރާތްޖަހައިލައި މަޖާކޮށްލާށެވެ. އެގެތެރެއިންވެސް ފެނުނީ އަންހެނުން ދަނޑިޖަހަމުން ދިޔަމަންޒަރެވެ. އެއީވެސް ހަމަ ޢީދަށް ތައްޔާރުވުމަށެވެ. މާބޮޑަށް ދަންވާންފެށުމުން 21:54 ގައި ސީދާ ގެއާ ދިމާއަށް މިސްރާބުޖެހީމެވެ. މާދުރަށް ހިނގަންނުޖެހި 4ވަރަކަށް މިނެޓްތެރޭ ގެއަށް އާދެވުނެވެ. ގެއަށް އައި މަގުމަތީ ވިލްފް، ގެއަށް ގުޅައި ކެއުން ތައްޔާރުކުރުމަށް އެންގިއެވެ. އޭރުވެސް ހުރީ ބަނޑަށް އުނދަގޫވާވަރަށް ކެވިފައެވެ. ނަމަވެސް ވިލްފްގެ އެދުމުގެ މަތިން ކުޑަކޮށްނަމަވެސް އެއްޗެއް ކެވޭތޯ މަސައްކަތްކުރީމެވެ. އެވަގުތު ކެއުންކުރިއަށްދިޔައިރު ވިލްފްގެ މަންމައާއެކު ވަރަށް ވާހަކަތަށް ދެކެވުނެވެ. ކައިނިމިގެން އަނެއްދުވަހުގެ ދަތުރަށް ތައްޔާރުވުމުގެ ގޮތުން ދަބަސް ތައްޔާރުކުރީމެވެ. ހުރިހާކަމަކުން މިންޖުވެ ނިދަން އޮށޯވެވުނުއިރު ގާތްގަނޑަކަށް 23:00 ވެދާނެއެވެ.

އެރޭ ވަރަށް އަރާމުގައި ނިދާލެވުނެވެ. އިރާދަކުރެއްވީތީ އެއްވެސް ހުވަފެނެއްގެ އަސަރެއްވެސް ނުކުރިއެވެ. އެއަރާމު ނިދިންހޭލައްވާލީ ފަތިހު 4:45ގައި ނަޝްފާގެ ކޯލެއް އައުމުންނެވެ. ނަޝްފާގެ އެދުމުގެ މަތިން ފަޠުޙުﷲ ސަރއަށް ގުޅައި ކަންތައްކުރަންވީގޮތް އޮޅުން ފިލުވީމެވެ. ސަރ އެންގިގޮތަށް 5:30ގައި ތައްޔާރުވެގެން ސުކޫލަށް ނިކުތުމަށް އަހަރެމެން ތައްޔާރުވާން ފެށީމެވެ. ތައްޔާރުވެ ނިމުނުއިރު ވިލްފްގެ މަންމަ ހުރީ ކުޑަގޮތަކަށް ކެއުން ތައްޔާރުކޮށްފައެވެ. ދަތުރަކަށް އަރާއިރު އެއްވެސް އެއްޗެއް އަހަރެން ނުކާތީ ހަމައެކަނި ސައިތަށީގެ ބޭނުންކޮށްލީމެވެ. އެއަށްފަހު 5:47ގައި ސުކޫލާ ދިމާއަށް މިސްރާބުޖެހީމެވެ. އަހަރެމެންނާއެކު ވިލްފާއި އޭނަގެ މަންމަވެސް އައެވެ. ގެއިން ނުކުތްގޮތަށް އަހަރެންނަށް ހޮޑުލެވުނެވެ. ހެނދުނު ހުސްބަނޑާހުރެ ކިރުތައްޓެއް ބޮއެފިނަމަ އެއީ އަހަރެންނަށް އާއްމުކޮށް ވާގޮތެކެވެ.

ސުކޫލަށް ދިޔައިރު ގިނަކުދިން އެތަނުގައި ތިއްބެވެ. ބައެއްކުދިން ނުއަންނާތީ އިންތިޒާރުގައި މުދައްރިސުން ތިއްބެވެ. ހުރިހާ ކުދިން ޙާޟިރުވުމުން އަތިރިމައްޗާ ދިމާއަށް މިސްރާބުޖެހިއެވެ. ހުރިހާ މުދައްރިސުންނާއި ބެލެނިވެރިންނާއި ދަރިވަރުންވެސް އަލްވަދާޢު ކިޔުމަށް އައެވެ. ނޭކުރެންދޫން ފުރުނީ 6:25 ގައެވެ. އޭރުވެސް ކޮންމެވެސް ވަރަކަށް ވައިޖެހެއެވެ. ކަނޑުވެސް ފުދޭވަރަކަށް ގަދައެވެ. ދޯނީގައި އަހަރެން އިނީ މެދައިހިސާބެއްގައި ގޮނޑީގައި އިށީނދެގެންނެވެ. އޭރު އެއްވެސް ގޮތަކަށް އުނދަގުލެއްނުވެއެވެ. ނަމަވެސް ގޮނޑިތަކުގައި ޖާގައޮތުމުން އޮށޯވެލީމެވެ. ނިދާލުމުގެވެސް އަޒުމުގައެވެ. ދޯނީގެ ދަތުރު ފެށިތާ މާގިނައިރުތަކެއް ނުވަނީސް ވާރޭވެސް އޮއްސާލިއެވެ. ނަމަވެސް ވާރޭގެ ސަބަބުން ވަކި ގަދައެއް ނުވެއެވެ. އެހެންނަމަވެސް ދޯނި ކުރިއަށްދިޔައީ ވަރަށް ބޮޑަށް ފުރޮޅަމުންނެވެ. ބައެއްފަހަރު ރާޅަށް ހިއްލައިލާފައި ވަރަށްބާރަށްވެސް ޖަހައެވެ.

ދަތުރު ފެށިތާ 30 މިނެޓްތެރޭގައި ބައެއްކުދިންނަށް އުނދަގޫތައްވެ ސަކަރާތްވާން ފެށިއެވެ. އެވަގުތުން ފެށިގެން އެހެން ކުދިންނާއި މުދައްރިސުން އެކުދިންނަށް އެހީތެރިވަމުންދިޔައެވެ. ނަމަވެސް އޭގެފަހުން އަހަރެންނަށް މާބޮޑަށް ވީނުވީއެއް ނޭނގެއެވެ. އަހަރެންނަށް ނިދުނީއެވެ. އެރޭ އަވަހަށް ހޭލަންޖެހުމުން ނިދިހަމަނުވީކަމަށްވެސް ވެދާނެއެވެ. އިރުކޮޅަކުން އަހަރެންނަށް ހޭލެވުނީ ޕްރިންސިޕަލާއި ޑެޕިއުޓީ ޕްރިންސިޕަލް އަހަރެންގެ ކައިރީ ހުރެގެން ވާހަކަ ދައްކާ އަޑަށެވެ. އަހަންނަށް އިވުނީ ހއ.މާރަންދޫއަށް ޖެއްސުމަށް މަޝްވަރާކުރިއަޑެވެ. އޭގެ ކުޑަ އިރުކޮޅެއްގެ ތެރޭގައި އަހަރެންނަށް ހަމަ އެއްކޮށް ހޭލެވިއްޖެއެވެ. ހޭލެވުމުން ދޯންޏަށް ރަނގަޅަށް ނަޒަރުހިންގާލީމެވެ. ކުރިން ކުދިންނަށް އެހީތެރިވެދިނުމުގައި ޙަރަކާތްތެރިވި ސުނީމިސްވެސް އޮތީ ސަކަރާތްވެފައެވެ. ހަމައެވަގުތު އަފްޝާނު ހޭނެތިގެން، ފަޠުޙުﷲސަރ ސީޕީއާރު ދެމުންދިޔައެވެ. ދޯނިމަތިން އިވެނީ ކުކުރުމާއި ރުއިމުގެ އަޑެވެ. އޭރުވެސް ކަނޑުގެ ރާޅަކަށް ބަދަލެއްނާދެއެވެ. ހަމަ އެހާ ގަދައެވެ.

2 ގަޑިއިރާއި 30 މިނެޓަށްފަހު މާރަންދޫއަށް ކުއްލިގޮތަކަށް ޖެއްސިއެވެ. އެއީ ސަކަރާތްވެފައިތިބި 6 ކުދިންނަށް ފަރުވާދިނުމަށެވެ. ދޯނި ލެފުމާއެކު ވަގުތުން އެކުދިންތައް އަތްދަނޑިމަތީގައި ސިއްޙީމަރުކަޒަށް ގެންދިޔައެވެ. ނަސީބަކީ އެރަށުގެ ސިއްހީމަރުކަޒު އަތިރިމަތީގައި ކައިރީ ހުރިކަމެވެ. އަހަރެންވެސް އެކުދިންތައް ސިއްޙީ މަރުކަޒަށް ގެންދިޔުމުގައި އެހީތެރިވެދިނީމެވެ. އެވަގުތު އެރަށުގެ މަރުކަޒުވެސް އޮތީ ކުއްލި ހާލަތަށް ގެނެސްއެވެ. ވަގުތުން ޑޮކްޓަރުއައިސް އެކުދިންނަށް ފަރުވާދެމުން ދިޔައެވެ. އެވަގުތުގައި ދަތުރުގެ އެންމެން ވަރުޖައްސާލުމަށް ކުރުނބާތަކެއް ހޯދައި އެހެންކުދިންނާއި މުދައްރިސުންނަށް ދެމުންދިޔައެވެ. އެރަށަށް ފޭބުމާއެކު އަހަރެންނަށް އެތައް ކޯލުތަކެއްއައެވެ. ޚަބަރު ބެލުމަށްޓަކައި ރަށުންވެސް ފަހަރަކު މީހަކު ދިޔައީ ގުޅަމުންނެވެ. 9:30 ހާއިރު އަހަރެންބަލައި ޅިޔަންބޭގެ ބައްޕައައުމުން އެގެއަށް ދިޔައީމެވެ. އެގެއަށް ގޮސް ސައިބޮއެގެން ކުޑަކޮށްއަރާމުކޮށްލެވޭތޯ ބެލީމެވެ. އެއަށްފަހު އަނެއްކާވެސް 10:00 ގައި މަރުކަޒަށް ދިޔައީމެވެ. މަރުކަޒަށް ދިޔުމުން އެނދުމަތި ކޮށްފައިވާ ކުދިންތަކުގެ އައިޑީކާޑުތައް ފަޠުޙުﷲސަރ އަހަރެންނާ ހަވާލުކުރިއެވެ.

ފަރުވާ ލިބެމުން ދިޔަވަރަކަށް ހުރިހާ ކުދިންވެސް ދިޔައީ ރަނގަޅުވަމުންނެވެ. ގިނައިރުތަކެއް ވަންދެން މަރުކަޒުގައި އިނުމަށްފަހު އަހަރެނާއި ފިރާޤް ދިޔައީ ނަޝްފާއާއެކު އެރަށު ޕްރިންސިޕަލްގެ ގެއަށެވެ. އެއީ އޭނަ ތާޒާވެލައި ހަމަޖެހިލުމަށްޓަކައެވެ. އެހެން އަންހެންކުދިންތަކެއް ވެސް އެގެއަށް އައުމުން އަހަރެމެން ދިޔައީ ދޯންޏަށެވެ. އެއީ ފިރާޤްގެ އެދުމުގެ މަތިން ދޯންޏަށް އެރުވި ކައިއެއްޗެތިން އެއްޗެއް ކައިލުމަށެވެ. އޭރު ގަޑިން 11:40 ވެއްޖެއެވެ. އެއަށްފަހު އަތިރިމަތީ ހުރި ޖޯލިތަކުގައި އަރާމުކޮށްލުމަށް އެހެންކުދިންތަކާއެކު އިށިނީމެވެ. އެތަނުގައި ތިއްބާ ސިރާޖުގެ ގޭގައި މެންދުރުގެ ކެއުން ތައްޔާރުކުރާ ޚަބަރުލިބުނެވެ. އެތަނުގައި ތިބެފައި 12:12 ގައި މެންދުރުގެ ކެއުންކެއުމަށް ދިޔައީމެވެ. ނަމަވެސް އަހަރެން އެއްވެސް އެއްޗެއް ނުކަމެވެ. ކާހިތްނެތީމައެވެ. އެވަގުތުވެސް އަހަރެން އުޅުނީ ކެމެރާ ހިފައިގެން ފޮޓޯތަކެއް ނެގޭތޯއެވެ.

އެންމެން ކައިގެން 12:45ގައި ފުރުމަށް އަތިރިމައްޗަށް ނުކުތެވެ. ނަމަވެސް ހުވާސްބޯޓު އިންޖީނު ހަލާކުވެގެން އެވަގުތު ދޯނި އޮތީ ކައިރީގައި އޮތް ތަކަންދޫގައެވެ. 15 މިނެޓްފަހުން ދޯނި އަނބުރާ މާރަނދޫއަށް އައުމުން އެންމެންވެސް ފުރުމަށް ދޯންޏަށް އެރިއެވެ. ދޯންޏަށް އެރުވި އިރުވެސް ދެ ކުއްޖަކު ހާލު ގޯސްވިއެވެ. ނަމަވެސް އިތުރު ފަރުވާ ދެވޭނީ ރަށަށް ދެވުމުން ކަމަށްވާތި ފުރީއެވެ. އޭރުވެސް ކަނޑު މާބޮޑަށް ގަދަނޫނަސް ގަދައޭ ބުނާވަރުވެއެވެ. ނަމަވެސް އުޑުމަތި އޮތީ ކުރިއަށްވުރެ ރަނގަޅަށެވެ. މާރަންދޫން ފުރައިގެން ރަށަށް ދެވެންދެން އަހަރެން އުޅުނީ ކުދިންނަށް އެހީތެރިވުމުގައެވެ.

މާރަންދޫން ފުރިފަހުން ހުރިހާ ކުދިންވެސް ކުރިއަށްވުރެ ރަނގަޅެވެ. މާބޮޑު ކަންތައްތަކެއް ދޯނިމައްޗަކު ނުހިނގައެވެ. 1ގަޑިއިރާއި 20މިނެޓްގެ ދަތުރަކަށްފަހު އަމާންކަމާއެކު އިހަވަންދޫގެ ފަޅަށްވަދެވުނިއިރު 14:15 ވެއްޖެއެވެ. އެއިރު ސުކޫލުގެ މެނޭޖްމަންޓުގެ ބޭފުޅުންނާއި ކުދިންގެ އާއިލާތަކުގެ މެންބަރުންވެސް އަތިރިމައްޗަށް އައިސްތިއްބެވެ. ހަމައެއާއެކު އެމްބިއުލާންސްއާއި އޮފީސް ވޭންވެސް އަތިރިމަތީ އޮތެވެ. އެއީ ސަކަރާތްވި ކުދިންތައް ސިއްހީމަރުކަޒަށް ގެންދިއުމަށެވެ. ދޯނިން ކުދިންތައް ބައިލައި އެމްބިއުލާންސްއަށް އެރުވުމުގައި އަހަރެން ހަރަކާތްތެރިވީމެވެ. އަދި އެހެން ކުދިންވެސް ދޯނިން ބޭލުމުގައި އަހަރެން ހަރަކާތްތެރިވީމެވެ. އެކަންތައްތައް ނިންމާލައި ގެއަށް ދެވުނުއިރު 15:00 ހިނގަނީއެވެ.