ރިވާޔަތު ޙަސަން

އޮޓޯބައޮގުރަފީ

ލިޔުނީ ޙަސަން ސަމީޙް/ ފުނަމާގެ

16 ޖަނަވަރީ 1995މ (15 ޝަޢުބާން 1415ހ) ދުނިޔެއަށް އަލްވަދާއުކީ ހއ.އިހަވަންދޫ [ފުއް އާއިލާ]އަށް ހިނިތުންވުމާ އުފާވެރިކަން ގެނެސްދީފައެވެ. ހއ. އިހަވަންދޫ ހުސްކުރީގެ [ޢާއިޝަތު އިބްރާހީމް] (ފުއްކަމަނަ)ގެ ޢަބްދުއްސައްތާރު އަޙްމަދާ ހއ.އުލިގަން ޅޮސްމާގެ ޢާއިޝަތު ޢަބްދުﷲއަށް 7ވަނަ ދަރިފުޅު ލިބުމުގެ އުފަލެވެ. އެދަރިފުޅަކީ އަޅުގަނޑު، ހއ.އިހަވަންދޫ ފުނަމާގޭ ޙަސަން ސަމީޙެވެ. އަޅުގަނޑަކީ އާއިލާގެ 7 މެންބަރުންގެ ތެރެއިން އެންމެ ހަގު މެންބަރެވެ.

އެހެންމީހުން، އަޅުގަނޑާ މުޚާތަބުކުރުމަށް ބޭނުންކުރަނީ ވަކި މިވެނި ނަމެކޭ ބުނާކަށް ނޭނގެއެވެ. އެއްބަޔަކު [ސަމީޙް] ވެސް ބޭނުންކުރެއެވެ. އެއާއެކު [ޙަސަން] ވެސް ބޭނުންކުރަނީ މަދަކުންނޫނެވެ. މައްސަލައެއްނެތެވެ. މިއިގެން ކޮންމެ ނަމަކީވެސް މާނައަށް ބަލާއިރުވެސް [ސަޅި] ދެނަމެވެ. ބޭނުންވަނީ [ޙަސަން]ގެ މާނައާ އެއްގޮތަށް ރަނގަޅު މީހަކަށްވުމެވެ. މިޒާޖުގައި މުޖުތަމަޢު ބަލައިގަންނަފަދަ ސިފަތަކެއް ހުރުމެވެ. އަޚްލާޤް ރަނގަޅުވުމެވެ. އަމިއްލަ އެދުމަށްވުރެ އެހެންމީހުންގެ ބޭނުންތައް އިސްކުރުމެވެ. ލަފާކުރެވޭ ގޮތުގައި ޅަދުވަހުން ފެށިގެން މިބޭނުންތަކަށް އަންނަނީ ކުލަ ޖެހެމުންނެވެ.

އަޅުގަނޑުގެ ޙަޔާތުގައި ޅަދުވަސްވަރު ހިނގާފައިވާ މާބޮޑު ކަންތައްތަކެއް ހަނދާނަކަށްނާދެއެވެ. އެހެންނަމަވެސް ހަނދާންހުންނަނީ ހިތުން ފިލުމެއްނުވާ މަންމަގެ އޯގާތެރިކަމެވެ. ބައްޕަ ޗުއްޓީއަށް ރަށަށް ދުރުވާއިރު ގެންނަވާ ހަދިޔާތަކެވެ. އާއިލާގެ ކޮންމެ މެންބަރެއްގެވެސް އަޅާލުމާ ކުލުނެވެ. އަލަށް ބައިސްކަލު ދުއްވަން ދަސްކޮށްދިނުމަށް އާއިލާގެ ހުރިހާ ބޭބޭންނާއި ދައްތައިން، މަގުގެ އެކި ހިސަހިސާބުގައި އެތުރިފައިވާ މަންޒަރެވެ. ވަކިން ޚާއްޞަކޮށް ރޯޝަނީގެ އަލްފާޟިލާ ޚަދީޖާ މުޙައްމަދު (ކިޔަވާއްތަ) ގާތަށް ޤްރުއާން ކިޔަވަންދިއުމަށް ހެނދުނު ފަތިހާ ހޭލާ ހަނދާނެވެ.

ދެން އަޅުގަނޑުގެ ޙަޔާތުގެ [މާ ބަގީޗާ]ގެ ރަން ދޮރާށިން އެތެރެއަށް ފިޔަވަޅުތަކެއް އަޅާނަމެވެ. ހަނދާންހުންނަ ގޮތުން އަޅުގަނޑުގެ ޙަޔާތުގައި ތަޢުލީމީ ދާއިރާއިން ޙަރަކާތްތަކެއް ފެށުނީ ރޯޝަނީގެ ކިޔަވާއްތަ ގާތަށް ކީރިތި ޤްރުއާން ކިޔަވަން ދިޔަ ހިސާބުންނެވެ. އެއަށްފަހު ވަފާ ޕްރީސްކޫލްގެ އެލްކޭޖީ ކިލާހުގައި 2000ވަނަ އަހަރު ކިޔެވީމެވެ. ނަމަވެސް އަޅުގަނޑަށް، ޔޫކޭޖީ ކިލާސް ކިޔެވުމުގެ ފުރުޞަތު ނުލިބި 2001ވަނަ އަހަރު އިހަވަންދޫ މަދަރުސާގެ ގުރޭޑް 1ށް ރަޖިސްޓްރީ ކުރެވުނެވެ. އެއަށްފަހު މިއަދު، އޭލެވެލް ވެސް މި ކިޔަވަނީ ހަމަ އިހަވަންދޫ މަދަރުސާއިންނެވެ.

އަޅުގަނޑުގެ ތަޢުލީމީ ޙަޔާތުގެ ހުރިހާ ޙާދިސާތަކެއްވެސް ކުރިލައި ހެދިފައިވަނީ ހަމަ އެންމެ ފުރާޅެއްގެ ދަށުންނެވެ. އެއީ އިހަވަންދޫ މަދަރުސާއެވެ. އަޅުގަނޑު، މިމަދަރުސާގެ ގުރޭޑް 1ގައި ހޭދަކުރި އަހަރު ހިނގި އެއްވެސް ކަމެއް އެއްގޮތަކަށްވެސް ހަނދާނަކަށް ނާދެއެވެ. އެހެންނަމަވެސް ގުރޭޑް 2ގައި، ލަކުޑި މޭޒު ދޮށުގައި ލަކުޑި ގޮނޑީގައި އިށީނދެ ތިބެގެން ކިޔެވި ހަނދާން އެބަހުއްޓެވެ. މިމަދަރުސާގައި ހޭދަކުރެވެނު ކޮންމެ އަހަރަކީވެސް ތަޢުލީމީ ގޮތުންނާއި ތަޖުރިބާގެ ގޮތުން އަޅުގަނޑަށް ލިބުނު އަގުމާތް ޖަވާހިރެކެވެ. އިރާދަކުރެއްވީތީ ގުރޭޑްތައް ކަޑައްތު ކުރަމުން ޖީސީއޯލެވެލް ފުރިހަމަކުރެވުނީ ހުރިހާ ރިޕޯޓްފޮތްތަކަކަށްވެސް [އޭ] ގުރޭޑް ގެނެސްދެމުންނެވެ. ކެރުން އިސްކޮށް ހިތްވަރާއެކެ އިތުރު ޙަރަކާތްތަކުގައި ބައިވެރިވެ ގިނަގުނަ ތަޖުރިބާތައް ލިބި ހުނަރު ކުރިއަރަމުންނެވެ.

މިހާތަނަށް އަޅުގަނޑަށް ލިބިފައިވާ ކާމިޔާބީތައް ހޯދިފައިވަނީ ތަޢުލީމީ ޙަޔާތުންނެވެ. ކޮންމެ ކިލާހަކުންވެސް އަޚްލާޤީ ގޮތުން އެންމެ ރަގަޅު ދަރިވަރުގެ ގޮތުގައި ލޭބަލް ކުރުމަކީ އަޅުގަނޑަށް ލިބުނު ކާމިޔާބެކެވެ. އޭގެ އިތުރުން 2008ވަނަ އަހަރު މިޒޯންގައި ބޭއްވުނު މަޒުމޫނު ލިޔުމުގެ މުބާރާތުން 1ވަނަ ޙާޞިލްވުމާއި ގުރޭޑް 10ގައި މަދަރުސާގެ ކެޕްޓަން ކަމުގެ މަޤާމު ލިބުމަކީ ބޮޑު ކާމިޔާބީތަކެކެވެ. ގުރޭޑް 10 ނިންމާ ޖީސީއޯލެވެލް އިން ރަނގަޅު ނަތީޖާއެއްލިބި ނެޝަނަލް ޓޮޕްޓެންގެ 3ވަނަ ޙާޞިލްވުމާއި 2010ވަނަ އަހަރު ބެސްޓް އޯލް ރައުންޑަރ ލިބުމަކީ ހިތުގައި ބިންވަޅުނެގިފައިވާ ކާމިޔާބީތަކެކެވެ.

ކާމިޔާބެއް ޙާސިލްވުމުގައާއި ކާމިޔާބަށް ވާޞިލްވެ ދާއިރާއަކުން ކުރިއަށް ދިއުމުގެ ފަހަތުގައި އެތައް އެހީތެރިންތަކަކާއި ހެޔޮއެދޭ އެތައް ބަޔަކުވާނެކަން ކަށަވަރެވެ. މިގޮތުން އަޅުގަނޑުގެ މައިންބަފައިންނާއި އާއިލާގެ 7 މެންބަރުންގެ ޙިއްސާ އަޅުގަނޑުގެ ކޮންމެ ކާމިޔާބެއްގެ ފަހަތުގައި ވާނެއެވެ. ވަކިން ޙާއްޞަކޮށް އައިމިނަތު ޢަބްދުސައްތާރު (ދޮންދައްތަ) ފާހަގަކޮށްލެވެއެވެ. އަޅުގަނޑުގެ ކިޔެވުމާއި ދިރިއުޅުމުގެ އެހެނިހެން ކަންތައްތައް އެންމެ ގާތުން ބަލައި ޖާނާއި މާލުން އެހީތެރިވެދެއްވަނީ އަމިއްލަ ދަރިއެއްފަދައިންނެވެ.

އަޅުގަނޑުގެ ދިރިއުޅުމުގައި ފާހަގަކޮށްލެވޭވަރުގެ ދައްޗެއް ނުވަތަ ހުރަހެއް ދިމައެއްނުވެއެވެ. ހެޔޮއެދޭ ފަރާތްތަކުގެ ނަޞޭޙަތާއި ލަފާގެ މަތިން ދިރިއުޅުން އަދި ވަރަށް ބާއްޖަވެރިއެވެ. އެހެންނަމަވެސް އަޅުގަނޑުގެ ޙަޔާތުގައި ހަނދާނުން ނުފިލާނެ ދެތިން ޙާދިސާ ވެއެވެ. އުސްތަނަކުން ވެއްޓި ވައަތުގެ ހުޅުނެއްޓުނު ދުވަހަކީ މީގެތެރެއިން އެއްދުވަހެވެ. އެދުވަހު އަޅުގަނޑުގެ ހޭނެތުނެވެ. ހޭ އެރީ އާއިލާގެ އެންމެން ވަށައިލާގެން ތިއްބައެވެ. ހުޅުއަޅުވައި ބޭސް އަޅަން ގެނައީ އުދަރެސް އާދަމް މޫސާއެވެ. އޭނަ އެޅުވި ބޭހަކުން ހުޅުގެ ލޮނދިގަނޑު ހިކި ހައްތަހާ ހުޅުގެ ރިހުން ގޯސްވީއެވެ. މިގޮތަށް ކަންތައް ދިމާވުމުން ދެން ދެއްކީ އަނޯނާގެ ޒާހިދާއަށެވެ. އޭނައަށް އެންމެ ފުރަތަމަ ޖެހުނީ ލޮނދިގަނޑު ރަނގަޅުކުރާށެވެ. ހަނދާން ހުންނަގޮތުން އަތުގައި ހުޅުއެޅުވުނީ އޭގެ ހަތަރުވަރަކަށް ދުވަސް ފަހުންނެވެ. ހުޅު އެޅުވި ދުވަހު ކަންތައް ދިޔަގޮތް އަލިފުން ޔާއަށް ތަފްޞީލުކޮށް ކިޔާދެވޭވަރަށް ހަނދާން އެބަހުއްޓެވެ. އެއީ ވޭން ހުރި ދުވަހެކެވެ. އެދުވަހު ރޮވުނު ވަރަށް ޙަޔާތުގައި ނުރޮމޭ ބުންޏަސް ދޮގަކަށް ނުވާނެއެވެ. ލަފާކުރެވޭ ގޮތުގައި އެދުވަސްވަރަކީ އަޅުގަނޑު ގުރޭޑް 2 ނޫނީ 3ގައި އުޅުނި ދުވަސްވަރެވެ.

މަދަރުސީ ޙަޔާތުން ވީއްލެން އަހަރަކަށްވެފައިވާއިރު ދިރިއުޅުމުގައި ކުރިއަށްދާނެ ދާއިރާއެއް އިޚްތިޔާރު ކުރުމަކީ ކޮންމެހެން ކުރަޖެހިފައިވާ ކަމެކެވެ. އެގޮތުން އަޅުގަނޑު މިހާރު ގަސްދުކޮށްފައި މިވަނީ ފަރުމާކުރުމުގެ ދާއިރާއިން ކުރިއަށް ދިއުމަށެވެ. ކުޑައިރުއްސުރެ ކުރެހުމަށާއި ފަރުމާކުރުމަށް ޝަޢުޤުވެރިކަން ހުރެއެވެ. އެހެންނަމަވެސް ކުލަކޮށް ކުރެހުންތައް ކުރެހުމަށް ވަނީ ހުރަސްތަކެއް އެޅިފައެވެ. އެއީ އަޅުގަނޑަށް ކުލަ ވަކިކުރަންނޭނގޭތީއެވެ. ނަމަވެސް މިކަމަށް ހުރި ޝަޢުޤަކަށް ކުޑަވެސް ބަދަލެއްނާދެއެވެ. އުންމީދު ކުރަނީ މިދާއިރާއިން ދެވެންއޮތް އެންމެ އުހަކަށް ދިއުމަށެވެ.

އަޅުގަނޑުގެ އުންމީދަކީ އަދި ބޭނުންވަނީ އަޅުގަނޑަކީވެސް މުޖުތަމަޢުގައި ޤަދަރަކާއި އިޙްތިރާމެއް ލިބިފައިވާ ފަރުދަކަށްވުމެވެ. އަޅުގަނޑުގެ ފެންވަރުން މުޖުތަމަޢަށާއި ޤައުމަށް ޚިދުމަތްތަކެއް ކުރުމެވެ. ހަމައެއާއެކު އާއިލާގެ ފަރާތުން ލިބެމުންދާ އެއްބާރުލުން އަބަދަށް ލިބުމެވެ. ހަމައެއާއެކު އާއިލާގެ އެންމެހާ މެންބަރުން ވެދެއްވި އެހީތެރިކަމުގެ އަގުން ކުޑަމިންވަރެއްނަމަވެސް އަދާކޮށްދިނުމެވެ.